Qazgıdromet sınoptıkteri Qazaqstanda 27, 28 aqpan jáne 1 naýryzda aýa raıy qandaı bolatyny týraly boljam jasady, dep habarlaıdy Egemen.kz.
Aldaǵy táýlikterde Qazaqstannyń basym bóliginde ońtústik sıklonnyń yqpaly jalǵasady. Nátıjesinde elimizde burqasynmen birge qar jaýady, respýblıkanyń ońtústigi men ońtústik-shyǵysynda jaýyn-shashyn jáne qar túrindegi jaýyn-shashyn kútiledi.
27 aqpanda shyǵysta, túnde ońtústik-shyǵystyń taýly aımaqtarynda, 28 aqpanda ońtústik-batysta, 1 naýryzda soltústik-batysta qalyń qar jaýýy múmkin. Túnde tuman, kóktaıǵaq, jeldiń kúsheıýi kútiledi, respýblıkanyń ońtústik-shyǵysynda sekýndyna 30 metr jáne odan da joǵary jeldiń kúsheıýi yqtımal.
«Aýa temperatýrasynyń túnde soltústik-batysta, shyǵysta, respýblıka ortalyǵynda 12-28 gradýs aıazǵa deıin, soltústikte 15-25 gradýs aıazǵa deıin tómendeýi kútiledi, ońtústikte, ońtústik-shyǵysta azdap 1-10 gradýs aıazǵa deıin kóteriledi, batysta negizgi aýa temperatýrasy 5-20 gradýs aıaz bolady», delingen habarlamada.