Qazaqstan Respýblıkasy Mádenıet jáne aqparat mınıstrliginiń Arhıv, qujattama jáne kitap isi komıteti geraldıkalyq jumys basqarmasy men «Geraldıkalyq zertteýler ortalyǵy» RMM-niń uıymdastyrýymen «Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri» taqyrybynda respýblıkalyq semınar ótti, dep jazady Egemen.kz.
Eki kúndik semınarǵa elimizdiń barlyq óńirlerinen memlekettik organdardyń, sondaı-aq Qazaqstan Respýblıkasy Ishki ister mınıstrligi men Saýda jáne ıntegrasııa mınıstrliginiń ókilderi, Májilis depýtattary men qoǵam qaıratkerleri qatysty.
Is-sharanyń basty maqsaty – memlekettik rámizder men vedomstvolyq nagradalar geraldıkasyn talqylaý, olardy nasıhattaý, ulttyq standarttar men zań talaptarynyń saqtalýyn qamtamasyz etý, sondaı-aq adal eńbek ıelerin marapattaý rásimin birizdendirý.
Aıta keteıik, Memleket basshysy Ulttyq quryltaıda geraldıka máselesine birneshe márte toqtalyp ótken bolatyn. Máselen, Túrkistanda ótken Ulttyq quryltaıda óńirlik nyshandardy júıeleý máselesin kóterse, taıaýda Býrabaıda ótken jıynda vedomstvolyq marapattardy retke keltirýdi tapsyrdy.
Jıyn barysynda óńirlik nyshandardy zań talaptaryna sáıkes bekitý jáne olardy birizdendirý, memlekettik rámizderge qatysty quqyq buzýshylyqtardy der kezinde anyqtap, tıisti sharalar qabyldaý, memlekettik rámizderdi paıdalaný tártibi men ulttyq standarttardyń saqtalýy, sondaı-aq Memlekettik rámizder kúnin merekeleý máseleleri talqylandy.
Atap aıtqanda, semınardyń alǵashqy kúninde Arhıv, qujattama jáne kitap isi komıteti geraldıkalyq jumys basqarmasynyń basshysy Gúldana Argenova Prezıdent tapsyrmasyna sáıkes óńirlik nyshandardy birizdendirý jóninde atqaralyp jatqan jumystardy baıandady.
Al Ishki ister mınıstrligi Tyl departamentiniń bas mamany Aıda Baıalıeva Qazaqstan Respýblıkasynyń memlekettik rámizderine qatysty quqyq buzýshylyqtardy ýaqtyly anyqtaý jáne shara qoldaný taqyrybynda sóz qozǵady.
Sondaı-aq, QR Saýda jáne ıntegrasııa mınıstrliginiń Standarttaý jáne taýarlardyń shyqqan elderi basqarmasynyń basshysy Qazbek Nurbek Qazaqstan Respýblıkasynyń Memlekettik Týy men Memlekettik Eltańbasy) ulttyq standarttarynyń saqtalýy men qoldanylýy jóninde aıtyp berdi.
Semınarǵa qatysýshylar atalǵan máselelerge qatysty suraqtary men oı-pikirlerin ortaǵa salyp, keńirek talqylady.
Semınardyń ekinshi kúni Qazaqstan Respýblıkasy Parlamenti Májilisiniń Zańnama jáne sot-quqyqtyq reforma komıtetiniń múshesi Abzal Quspan memlekettik rámizderge qatysty jaýapkershilikti kúsheıtý máselesin kóterip, zańnamalyq ózgerister engizýge qatysty oılaryn ortaǵa saldy.
Qazaqstan Respýblıkasynyń Memlekettik eltańbasy avtory Jandarbek Málibekov memlekettik rámizderdiń máni men mańyzyna toqtalyp, óńirlik nyshandardy birizdendirý týraly bastamaǵa qoldaý bildirdi.
Sonymen qatar tuńǵysh rámiztanýshy Erbol Shaımerdenovtyń jary, ustaz Kúlásh Qaıyrjanqyzy sóz sóılep, memlekettik rámizderdi ázirleý kezindegi qıyndyqtar men estelikter jóninde oı bólisti.
Is-shara sońynda semınarǵa qatysýshylarǵa sertıfıkattar men estelik syılyqtar tabystaldy.