Aldaǵy kúnderi el aýmaǵynda atmosferalyq fronttardyń ótýine baılanysty aýa raıy qubylmaly bolady. Kóptegen óńirlerde jańbyr jaýyp, naızaǵaı oınap, keı jerlerde burshaq túsýi yqtımal. Sonymen qatar, túngi ýaqytta soltústik-batys pen soltústik óńirlerde jańbyrmen qatar qar jaýýy múmkin, dep habarlaıdy Egemen.kz.
12 sáýir kúni Qostanaı oblysynda, 13-14 sáýirde Aqmola oblysynda, al 14 sáýirde Pavlodar, Qaraǵandy, Shyǵys Qazaqstan, Almaty, Abaı jáne Jetisý oblystarynda jaýyn-shashyn kútilýde. Sol kúni Ulytaý oblysynda da jańbyr nemese qar jaýýy yqtımal. Respýblıka boıynsha tuman túsýi múmkin.
Sýyq aýa massalarynyń áserinen keıbir óńirlerde aıaz kútiledi. Atap aıtqanda, 12 sáýirge qaraǵan túni Batys Qazaqstan men Atyraý oblystarynda, al 12-14 sáýir aralyǵynda Aqtóbe, 13-14 sáýirde Qostanaı, Aqmola jáne Soltústik Qazaqstan oblystarynda 1-3 gradýs aıaz boljanyp otyr.
Kúndizgi aýa temperatýrasy óńirlerge qaraı ártúrli bolady:
Batys Qazaqstanda 13-20 gradýstan 17-23 gradýsqa deıin kóteriledi; Ońtústik-batysta 15-20-dan 22-27 gradýsqa deıin jyly bolady; Soltústik-batysta 8-15 gradýstan 12-20 gradýsqa deıin kóteriledi; Soltústik pen ortalyq óńirlerde 20-25 gradýstan 10-15 gradýsqa deıin salqyndaıdy; Shyǵysta 23-29 gradýstan 12-20 gradýsqa deıin tómendeıdi; Ońtústikte 28-33 gradýstan 23-28 gradýsqa deıin salqyndaıdy; Ońtústik-shyǵysta 23-33 gradýstan 18-25 gradýsqa deıin tómendeıdi dep boljanǵan.Mamandar turǵyndardy aýa raıynyń kúrt ózgeristerine daıyn bolýǵa jáne qaýipsizdik sharalaryn saqtaýǵa shaqyrady.