Elordada jekemenshik balabaqsha men ata-ananyń arasyndaǵy janjal ýshyqty. Astanalyq áıel elorda ákimine balasynyń balabaqshada «býllıngke» ushyraǵanyn aıtyp shaǵymdanǵan. Alaıda, balabaqsha basshylyǵy bul málimdemeni joqqa shyǵaryp, áıeldiń ústinen úshinshi ret sotqa júginip otyrǵanyn málimdegen, dep habarlaıdy Egemen.kz.
Oqıǵa 2024 jyldyń tamyzynda bastalǵan. Áıeldiń aıtýynsha, onyń 2 jasar balasy «Erkenaz» jekemenshik balabaqshasyna baryp júrgen. Qyrkúıekte ata-analar chatynda kelispeýshilik týyndap, aqyry balany balabaqshadan zańsyz shyǵaryp jibergen.
Alaıda, balabaqsha basshylyǵy bul aıyptaýlardy joqqa shyǵaryp otyr. Olardyń aıtýynsha, balaǵa qatysty eshqandaı qorlaý bolmaǵan, al ata-analar arasyndaǵy daý beıresmı chatta týyndaǵan.
«Ata-analardyń biri tarapynan balabaqsha ákimshiligi balany býllıngke ushyratty degen aqparat shyndyqqa janaspaıdy. Balabaqsha qyzmetkerleri balaǵa qatysty eshqandaı qorlaıtyn nemese orynsyz sózder aıtqan joq. Analar balabaqshanyń beıresmı «ata-analar chatynda» ózara ursysyp qalǵan. Balaǵa qatysty sózderdi bizdiń atymyzdan oıdan shyǵaryp, jala japty dep kórsetti. Biz osyǵan baılanysty polısııaǵa aryz jazdyq, tipti, keshe aryz berip te qoıdyq», dedi balabaqsha basshylyǵy.Balabaqsha buǵan deıin áıeldi úsh ret sotqa berip, eki is boıynsha jeńiske jetkenin alǵa tartqan.
«Bir kúni áıel biz týraly 2GIS platformasyna jalǵan pikir jazyp, qujattarymyz joq dep, basqa da jalǵan málimet taratqan. Biz ol úshin sotqa aryz berip, sot bizdiń jaqqa shyqty. Sot sheshimimen ol pikirler óshirildi jáne ketken barlyq shyǵyndy sol áıel ótep berýge mindetteldi. Keıin bul áıel Astanadaǵy bilim basqarmasyna aryz jazdy. Biraq sot bul áreketin de zańsyz dep tanyp, ony da joqqa shyǵardy. Endi jaqynda ákim jıyn ótkizgende áıel qaıtadan negizsiz aıyp taǵyp, bizge jala japty. Qazir biz Almaty aýdandyq polısııa basqarmasyna onyń ústinen aryz jazdyq. О́kinishke qaraı, burynǵy aryzymyz boıynsha is áli ashylmaǵan. Sondyqtan qaıtadan aryz berdik», dedi balabaqsha basshylyǵy.
Astana bilim basqarmasy bul daýdy qos taraptan tekserip jatqanyn rastady. Basqarmanyń málimetinshe, áıeldiń balasy ózge balalarǵa birneshe ret dene jaraqatyn keltirgen.
«Tekseristen keıin aryzdanýshynyń balasyna baǵyttalǵan sózdi balabaqsha pedagogi aıtpaǵany anyqtaldy. Buǵan deıin ata-analardyń aıtýynsha, aryzdanýshynyń balasy birneshe ret ózge balalarǵa dene jaraqatyn keltirgen. Osyǵan baılanysty jábir kórgen balalardyń biriniń ata-anasy emosııaǵa berilip «Bıshimbaev» degen sózdi qoldanǵan. Qazir arnaıy monıtorıngtik top qurylyp, ekijaqty tekserý jumystary bastaldy», delingen habarlamada.