2025 jylǵy 2 mamyrda Qazaqstan Respýblıkasy Mádenıet jáne aqparat mınıstrliginiń qoldaýymen, Qazaqstan Respýblıkasynyń Ulttyq mýzeıi men Máken Tóregeldın atyndaǵy Jezdi kentindegi Taý-ken jáne balqytý isi tarıhy mýzeıiniń birlesken jobasy – «Qazaqstan – maıdan arsenaly» atty kórmeniń saltanatty ashylýy ótti. Kórme Ulttyq mýzeıdiń Atrıým zalynda uıymdastyrylyp, 9 maýsymǵa deıin jalǵasady. Bul mádenı shara – elimizdiń tarıhyndaǵy mańyzdy belesterdiń biri – Uly Otan soǵysyndaǵy Jeńistiń 80 jyldyǵyna arnalǵan, dep habarlaıdy Egemen.kz.
Jeńis pen birliktiń 80 jyldyǵyna oraı atalyp ótetin bul jyl, halyq jadyna otty jyldardaǵy erlik pen qajyrly eńbek, tyl men maıdan arasyndaǵy myzǵymas baılanys, eldik pen birlik uǵymdaryn tereńinen sińirýge múmkindik beredi. Osy turǵydan alǵanda, «Qazaqstan – maıdan arsenaly» kórmesi – rýhanı jańǵyrý men urpaq sabaqtastyǵynyń kórinisi.
Kórmeniń basty maqsaty – Qazaqstan halqynyń Uly Otan soǵysyndaǵy jeńiske qosqan súbeli úlesin, tyl eńbekkerleriniń qajyrly eńbegi men patrıottyq rýhyn mýzeı qoryndaǵy tarıhı jádigerler arqyly kópshilikke tanystyrý. Sonymen qatar, bul kórme jas urpaqtyń tarıhı sanasyn jańǵyrtyp, otansúıgishtikke, elge degen mahabbatqa tárbıeleýdi kózdeıdi. Ekspozısııa tórt taqyryptyq bólimnen turady.
Qazaqstannyń ken oryndary men munaıy – elimizdiń tabıǵı resýrstaryn tıimdi paıdalaný arqyly maıdandy qajetti shıkizatpen qamtý barysy. Ásirese, soǵys jyldarynda Qanysh Sátbaevtyń jetekshiligimen ashylǵan Jezdi marganes ken ornynyń mańyzy erekshe atap ótiledi. Bul ken orny maıdan úshin qajet strategııalyq metaldardyń biri – marganestiń negizgi kózine aınaldy.
Soǵys jyldaryndaǵy Qazaqstannyń óndiris oryndary – elimizge evakýasııalanǵan zaýyttar men fabrıkalardyń jumys isteýi, qorǵasyn, mys sııaqty metaldardyń óndirilýi men onyń maıdan qajettilikterin qamtamasyz etýi.
Aýyl sharýashylyǵy – tyldaǵy aýyl halqynyń janqııarlyq eńbegi, Jambyl, Qyzylorda, Ońtústik Qazaqstan oblystaryndaǵy kúrish, bıdaı, maqta alqaptarynyń ónimdiligi. Ataqty kúrishshi Ybyraı Jaqaevtyń oraǵy men ketpeny – aýyl sharýashylyǵyndaǵy eńbektiń sımvoly retinde usynylǵan.
Maıdan brıgadalary – Qazaqstanda qurylǵan áskerı bólimder, olardyń maıdandaǵy erlikteri men jaýyngerlik joly. Sonymen qatar, halyqtyń maıdanǵa kórsetken kómegi – Qajymuqan Muńaıtpasovtyń óz qarjysyna ushaq jasatyp, ony Qyzyl Armııaǵa syıǵa tartýy jónindegi tarıhı qujattar men alǵys hat erekshe nazar aýdararlyq.
Sonymer qatar kórme aıasynda arhıvtik qujattar, fotomaterıaldar, sırek kezdesetin jádigerler men turmystyq buıymdar usynyldy. Jádigerler arasynda zamanaýı ınteraktıv tehnologııalarmen tolyqtyrylǵan ekspozısııalar da bar: vırtýaldy sholý, 3D modeldeý, aýdıogıdter. Osy kórme arqyly Uly Otan soǵysy jyldaryndaǵy halqymyzdyń tózimdiligi men birligin qaıta jańǵyrtyp, jaýyngerler men tyl eńbekkerleriniń eńbegi kórsetildi.