Pahalgam qalasyndaǵy lańkestik áreket Pákistan men Úndistan arasyndaǵy daýly máseleni odan ári ýshyqtyra tústi. Osyǵan oraı Astanada elimizdegi Pákistan Islam Respýblıkasynyń Tótenshe jáne ókiletti elshisi Naýman Bashır Bhattı brıfıng ótkizip, Djammý men Kashmırdegi qazirgi jaǵdaıǵa qatysty pikir bildirdi.
Pahalgam qalasynda bolǵan qarýly toptyń qastandyq áreketinen 25 Úndistan azamaty men bir Nepal azamaty qaza taýyp, kóp adam jaralanǵan. Osydan soń Úndistan úkimeti Djammý men Kashmırde jappaı tintý júrgizdi. Úndistan quqyq qorǵaý organdarynyń málimetinshe 1500-den asa adam qamaýǵa alynǵan.
Qazirde Pahalgam – halyqaralyq deńgeıde daýly aýmaq retinde tanyldy, áli de Úndistannyń zańsyz okkýpasııasyndaǵy Djammý jáne Kashmır aımaǵynyń bir bóligi.
– Pákistan shıelenistiń artýyn qalamaıtynyn atap ótkim keledi. Bul eldiń saıası basshylyǵy tarapynan barlyq deńgeıde ashyq málimdelgen. Sonymen qatar biz egemendigimiz ben aýmaqtyq tutastyǵymyzdy qorǵaýǵa daıynbyz. Eger Úndistan tarapynan agressııa bolsa, Pákistan BUU Jarǵysynda bekitilgen óz-ózin qorǵaý quqyǵyn tolyq paıdalanady, – dedi N.Bhattı.
Elshiniń aıtýynsha, Pahalgamdaǵy oqıǵadan keıin Pákistan da málimdeme jasaǵan. Olar Úndistan basshylyǵy men BAQ ókilderi Pákistanǵa qarsy jalǵan aqparat taratyp jatqanyn aıtady. Pahalgam sııaqty oqıǵalardy paıdalanyp ózderiniń ishki saıası kún tártibin ilgeriletip, Úndistannyń ishki sátsizdikteri men Djammý jáne Kashmırdiń zańsyz okkýpasııasyndaǵy repressıvti saıasatyn jasyrýǵa tyrysady. Sonymen qatar Kashmır halqy men úndi musylmandaryna qarsy ıslamofobtyq ustanymdardy kúsheıtýge tyrysyp jatyr.
– Biz Pahalgamdaǵy oqıǵaǵa Pákistandy baılanystyrýǵa baǵyttalǵan kez kelgen áreketti joqqa shyǵaramyz. Pákistan bul iske qatysy joq jáne mundaı oqıǵadan paıda kóretin tarap emes. О́kinishke qaraı, oqıǵadan keıin birneshe mınýt ishinde Úndistan Pákistandy aıyptaı bastady, eshbir dálelsiz, negizsiz aıyptady. Bul oqıǵadan keıin Úndistan úkimeti áli de eshqandaı naqty dálel usynǵan joq. Osyǵan oraı Úndistannyń óz ishinde de, halyqaralyq qaýymdastyq tarapynan da suraqtar týyndap otyr, – dedi elshi.
Sondaı-aq ol Úndistan 1960 jyly jasalǵan Ind ózeni týraly kelisimdi buzyp otyrǵanyn aıtady. Bul kelisimniń zańdy kúshi bar, óıtkeni Dúnıejúzilik banktiń qatysýymen jasalǵan. Kelisim sonymen qatar Pákistannyń úsh batys ózeniniń quqyqtaryna kepil bola alady.
– Bul ózenderdiń sýyn eldiń 240 mıllıonnan astam turǵyny paıdalanyp otyr. Atalǵan kelisimdi toqtatý – birjaqty jáne zańsyz áreket. Kelisimde mundaı másele qarastyrylmaǵan. Úndistannyń osy zańsyz áreketi óńirlik beıbitshilik pen turaqtylyqqa qaýip tóndirip, apatty jaǵdaıǵa ákelýi múmkin. Pákistannyń Ulttyq qaýipsizdik keńesi kelisim boıynsha Pákistanǵa tıesili sýdyń aǵynyn toqtatý nemese burý áreketin qaqtyǵys aktisi retinde qabyldaıtynyn jáne oǵan jaýap beriletinin naqty málimdedi. Pákistan barlyq kórshimen beıbit jáne tatý kórshilik qarym-qatynas ornatýǵa umtylady. Biz ózara qurmetke, egemendik teńdigine, beıbit ómir súrýge jáne sheshilmegen daýlardy beıbit jolmen sheshýge negizdelgen qatynastardy qalaımyz, – dep jetkizdi Pákistan bıliginiń ustanymyn N.Bhattı.
Qazir Úndistan men Pákistan oq atýdy toqtatýǵa resmı túrde keliskenderin málimdedi. Úndistan Syrtqy ister mınıstri Vıkram Mısrı eki eldiń áskerı qurylymdary arasynda kelissózder ótkenin habarlady. Al Pákistan premer-mınıstri Shahbaz Sharıf AQSh prezıdenti Donald Trampqa beıbit kelisimge qol jetkizýdegi belsendiligi úshin alǵys bildirdi.
«AQSh-tyń deldaldyǵymen ótken uzaq kelissóz túninen keıin men Úndistan men Pákistannyń atysty tolyq jáne dereý toqtatý jóninde keliskenin qýana habarlaımyn», dep jazdy D.Tramp «TruthSocial» áleýmettik jelisindegi paraqshasynda.
Alaıda kelisimniń naqty sharttary áli jarııalanǵan joq.