«Astana Tazalyq» JShS BAQ ókilderi men blogerler arasynda baıqaý jarııalady. Jalpy júlde qory 4 mıllıon teńgeni quraıdy. «Taza Qazaqstan – Taza Astana» baıqaýy respýblıkalyq «Taza Qazaqstan» ekologııalyq aksııasy men Astana kúnine oraı uıymdastyrylady, dep habarlaıdy Egemen.kz.
Baıqaýdyń basty maqsaty – qoqys jınaý men shyǵarýǵa, kósheler men qoǵamdyq oryndardy tazalaýǵa baǵyttalǵan jumystardy nasıhattaý, «Astana Tazalyq» kásipornynyń qyzmetin keńinen tanytý jáne Jumysshy mamandyqtar jyly aıasynda tazalyqty qamtamasyz etetin sala mamandaryna nazar aýdarý.
Baıqaýǵa qazaqstandyq buqaralyq aqparat quraldarynyń jýrnalısteri men blogerleri qatysa alady. Shyǵarmashylyq saıys kelesi tórt nomınasııa boıynsha ótedi:
1) «Úzdik televızııalyq materıal»; 2) «Áleýmettik jelilerdegi úzdik jarııalanym»; 3) «Baspa basylymyndaǵy úzdik maqala»; 4) «Internet-basylymdaǵy úzdik jarııalanym».
Baıqaýǵa 2025 jylǵy 15 mamyr men 30 maýsym aralyǵynda memlekettik nemese orys tilinde shyqqan jumystar qabyldanady. Baıqaýǵa usynylatyn jumystar sany shektelmegen.
Jumystardy táýelsiz komıssııa baǵalaıdy. Komıssııa quramyna kommýnaldyq sala mamandary men tájirıbeli jýrnalıster kiredi. Qazylar alqasy tómendegi krıterıılerge súıene otyryp baǵalaıdy:
1) berilgen taqyryptyń ózektiligi jáne sáıkestigi; 2) taqyrypty ashý tereńdigi jáne usynylǵan aqparattyń shynaıylyǵy; 3) baıandaý stıli; 4) avtorlyq paıymnyń biregeıligi.
Baıqaýǵa qatysý úshin materıaldar kelesi elektrondy poshta arqyly qabyldanady: astana_tazalyk@mail.ru.
Baılanys nómiri: +7 700 259 2188. Jumystardy qabyldaý ýaqyty: 2025 jylǵy 30 maýsym, saǵat 18:00-ge deıin (Astana ýaqytymen).
Baıqaý qorytyndysy 2025 jylǵy 3-4 shilde aralyǵynda jarııalanady.