Jasandy ıntellektke negizdelgen otandyq RE:CREATE AI jobasy qysqa merzim ishinde qarqyndy damyp, Activate VC jáne Jas Ventures qorlarynan 150 000 dollar ınvestısııa tartýǵa qol jetkizdi. Bul – Astana Hub bastamasymen ótken AI’preneurs akselerator baǵdarlamasynyń nátıjeli túlekteriniń biri, dep jazady Egemen.kz.
Aıta keteıik, AI’preneurs — Qazaqstanda jasandy ıntellekt salasyndaǵy startaptarǵa arnalǵan alǵashqy akseleratorlardyń biri. Astana Hub bul baǵdarlamany elimizdegi JI tehnologııalary men ınnovasııalyq ekojúıeni damytý maqsatynda iske qosqan. Baǵdarlama arqyly jasandy ıntellektke negizdelgen ónimder jasap jatqan kásipkerlerge qoldaý kórsetilip, olardy naryqqa shyǵarý jáne masshtabtaý joldary úıretiledi.
RE:CREATE AI — Instagram, TikTok, YouTube sekildi tanymal platformalar úshin trendtegi kontent ıdeıalaryn, ssenarıılerdi jáne beıimdelgen nusqalardy usynatyn ınnovasııalyq servıs. Bul qural ásirese blogerler, kontent-meıkerler, shaǵyn bıznes ıeleri úshin paıdaly. Qoldanýshy júıege óz baǵyty boıynsha suranys jiberedi, al servıs oǵan tanymal ári kóp qaralym jınaǵan ıdeıalardyń negizinde usynystar beredi. Osylaısha, ýaqyt pen kúsh únemdelip, sapaly nátıje alýǵa múmkindik týady.
Bastapqyda bul joba beınejazba ssenarıılerin avtomatty túrde bólip alyp, qaıta qoldanýǵa beıimdeıtin qural retinde oılastyrylǵan bolatyn. Alaıda alǵashqy paıdalanýshylar daıyn ıdeıalardyń ózektiligin alǵa tartyp, komanda baǵytty ózgertedi. Nátıjesinde joba kontenttik trendterge saraptama jasaıtyn izdeý platformasyna aınaldy.
AI’preneurs baǵdarlamasyna qatysý joba damýyna úlken serpin berdi. Baǵdarlama bastalǵan kezde RE:CREATE AI-diń tek MVP (eń qarapaıym jumys isteıtin úlgisi) nusqasy ǵana bar bolatyn. Jobanyń negizin qalaýshy Zákirjan Aısabaev bul júıeni alǵashynda óziniń áleýmettik jelidegi blogyn damytý úshin paıdalanyp kórgen. Akselerasııa barysynda komanda ondaǵan qoldanýshymen suhbat júrgizip, AQSh-ta zańdy tirkeýden ótip, alǵashqy aqyly jazylymdaryn synap, post-MVP kezeńine ótti. Jobanyń qoldanýshylar sany osy kezeńde 10 000-nan asty.
«Baǵdarlamaǵa deıin men tek kod jazýǵa mán beretinmin. Al qazir ónimdi naqty tutynýshy úshin jasap jatyrmyn. AI’preneurs maǵan satý jolyn, bıznes-model jasaýdy jáne qıyndyqtarmen kúresýdi úıretti. Men osy kúni ınvestor tarta alatyn startap ıesine aınaldym. Árıne, sharshaǵan, kúızelgen sátter boldy. Biraq sol kezderde ónimniń tehnıkalyq jaǵy emes, qundylyǵy mańyzdy ekenin túsindim. Al alǵashqy jyldyq jazylym satylǵanda, óz jolymyzdyń durys ekenin uqtym», deıdi Zákirjan Aısabaev.
Baǵdarlama sońynda joba Activate VC uıymdastyrǵan Clash of Startups saıysynda úshinshi orynǵa ıe boldy. Bul jeńis ınvestorlardyń nazaryn aýdardy. Eki aı ishinde 10 000-nan astam qoldanýshy tirkelgende, qorlar startapqa qarjy quıý týraly sheshim qabyldaıdy.
Tartylǵan qarajat endi ónimdi ázirleý komandasyn keńeıtýge, mobıldi qosymsha jasaýǵa, AI algorıtmderin jetildirýge jáne marketıngti aýqymdy deńgeıge shyǵarý úshin jumsalmaq.