Keshe Almatyda kásipker, mesenat, kolleksıoner Nurlan Smaǵulov negizin qalaǵan «Almaty Museum of Arts» zamanaýı óner mýzeıi ashyldy. Mýzeıdiń ashylý saltanatyna Mádenıet jáne aqparat mınıstri Aıda Balaeva, Almaty qalasynyń ákimi Darhan Satybaldy, mýzeıdiń negizin qalaýshy Nurlan Smaǵulov, sondaı-aq óner salasy jáne BAQ ókilderi qatysty.
«Almaty Museum of Arts»-tyń mıssııasy – zamanaýı óner úderisterin qoldaý jáne zertteý, olardyń álemdik mádenıettegi mańyzyn ashý. Mýzeı qoryna Qazaqstannan jáne basqa da elderden jınalǵan 700 óner týyndysy endi. Mýzeıdiń kórkemdik strategııasy men baǵdarlamalyq mazmunyn kórkemdik jetekshi Merýert Qalıeva ázirledi. Mýzeıde eki joba ashyldy. Onyń biri – «Qonaqtar» atty mýzeıdiń óz kolleksııasy qoıylǵan kórme jáne otandyq sýretshi Almagúl Meńlibaevanyń «Men bárin túsinemin» atty retrospektıvalyq ekspozısııasy.
Is-shara barysynda Aıda Balaeva bul mýzeı ónerdi, zamanaýı tehnologııalardy, mýltımedııalyq sheshimder men kreatıvti ındýstrııa quraldaryn biriktiretin jańa mádenı bastama ekenin atap ótti. Mınıstr Prezıdent Joldaýyndaǵy tujyrymdardy eske salyp, jas urpaq úshin patrıotızmniń basty kórsetkishi jasampazdyq pen jańashyldyqta ekenin jetkizdi. Ol úlgi retinde kásipker ári mesenat Nurlan Smaǵulovtyń aıryqsha qyzmetin atap ótti.
«Bul mýzeı tek ónerdi tamashalaý alańy emes, shyǵarmashylyq oıdyń, jańa ıdeıalar men halyqaralyq dıalogtiń ortalyǵyna aınalatynyna senemin. Mýzeı Almatynyń mádenı ómirin baıytyp, Ortalyq Azııa ónerin halyqaralyq deńgeıde damytýǵa zor úles qosady», dedi A. Balaeva.
Jalpy aýmaǵy 10 myń sharshy metrden asatyn mýzeı ǵımaratyn brıtandyq «Chapman Taylor» sáýlet bıýrosy jobalaǵan. Birinshi qabatta keń kórme zaldary ornalasqan, sonyń ishinde «Uly dala» jáne «Saryarqa» zaldary bar. Ortalyq keńistik «Art Street» atrıýmyna berilgen, ol Sharyn shatqalynyń tabıǵı pishinderin beıneleıdi. Sondaı-aq munda kásibı qor saqtaý orny, restavrasııalyq ortalyq jáne «Sheberhana» atty kreatıvti keńistik ornalasqan.
Mýzeı kolleksııasynyń 70%-dan astamy HH ǵasyrdyń kórnekti otandyq sýretshilerdiń eńbeginen turady. Atap aıtsaq, Jańataı Shárdenov, Toqbolat Toǵyzbaev, Maqym Qısamedınov, Shaımardan Sarıev shyǵarmalary qoıylǵan. Sondaı-aq otandyq zamanaýı ónerdiń negizgi tulǵalary atanǵan Rústem Halfın, Sáýle Súleımenova, Saıd Atabekov jumystary da bar. Bolashaqta mýzeı óz kolleksııasyn tolyqtyryp, maqsatyn jalǵastyra bermek. Murajaı Qazaqstan men Ortalyq Azııa aımaǵyndaǵy ónerdi usyný jáne zertteý jáne halyqaralyq deńgeıde tanytýdy maqsat etedi.
Mýzeı 12 qyrkúıekten bastap óz qyzmetine bastaıdy.