Memlekettik keńesshi Erlan Qarın Astanadaǵy Dostyq úıinde respýblıkalyq etnomádenı birlestikterdiń jetekshilerimen kezdesti.
Basqosýǵa Zaınýddın Mahýseev, Akbarjon Ismaılov, Taýfık Karımov, Narıne Mıkaelıan, Ahmet Mýradov, Iýrıı Tımoshenko, Abdýlla Ismatýllaev, Shavkat Ismaılov, Dmıtrıı Ostankovıch, Abılfas Hamedov, Vıtalıı Tvarıonas, Isıdor Borchashvılı, sondaı-aq Parlament Senaty men Májilisiniń depýtattary Zakırjan Kýzıev, Evgenıı Bolgert, Sergeı Ponomarev, Natalıa Dementeva jáne Qazaqstan halqy Assambleıasy tóraǵasynyń orynbasary Marat Ázilhanov qatysty.
Kezdesýde Ulttyq quryltaıdyń besinshi otyrysynda aıtylǵan bastamalar men etnomádenı birlestikterdiń eldegi saıası jańǵyrýdyń negizgi baǵyttaryn iske asyrýǵa qatysý máseleleri talqylandy.
Memlekettik keńesshi júrgizilip jatqan konstıtýsııalyq reformanyń elimizdiń ornyqty damýynda mańyzy zor ekenin atap ótti. Erlan Qarınniń aıtýynsha, memlekettik saıasattyń «Birligimiz – áralýandyqta» myzǵymas qaǵıdaty qoǵamdyq birliktiń negizi sanalady.
Etnomádenı birlestikterdiń ókilderi Memleket basshysynyń mádenı-gýmanıtarlyq, áleýmettik-ekonomıkalyq jáne saıası baǵyttaǵy bastamalary men sheshimderi, sondaı-aq Quryltaıdyń besinshi otyrysynda aıtylǵan usynystar el damýynyń jańa kezeńine qatysty tutas kózqarasty qalyptastyratynyn jetkizdi.
Etnomádenı birlestikterdiń jetekshileri Prezıdent bastamalaryn qoldaıtynyn bildirip, aldaǵy reformalardy iske asyrýǵa belsendi túrde qatysýǵa daıyn ekenin aıtty.