Qazaqstan qor bırjasy (KASE) naryq qatysýshylaryna usynylatyn qyzmetter men qarjy quraldarynyń aıasyn keńeıtý baǵytyndaǵy jumysty jalǵastyryp keledi. Osy maqsatta bırja eýromen esep aıyrysýdy engizý múmkindigin zertteı bastady. Bul bastama saýda operasııalarynyń tartymdylyǵyn arttyryp, KASE-niń halyqaralyq deńgeıdegi pozısııasyn kúsheıtýge jol ashýy múmkin, dep jazady Egemen.kz.
Eýromen esep aıyrysýdy qarastyrýǵa birneshe faktor áser etken. Atap aıtqanda, eýronyń Qazaqstannyń halyqaralyq saýdasyndaǵy mańyzy, Eýropa elderimen ornyqqan saýda jáne ınvestısııalyq baılanystar, sondaı-aq naryq qatysýshylary tarapynan valıýtalyq esep aıyrysýdy ártaraptandyrýǵa degen suranys bar.
KASE jaqsylyqtan úmitti
KASE ókilderiniń aıtýynsha, eýroǵa qyzyǵýshylyq Qazaqstannyń syrtqy ekonomıkalyq qyzmetindegi bul valıýtanyń rólimen tikeleı baılanysty. Sonymen qatar bırjalyq operasııalarda valıýtalyq múmkindikterdi keńeıtý qajettigi de ózekti. Eýropalyq ıýrısdıksııalarmen qalyptasqan turaqty saýda-ınvestısııalyq qatynastar bul bastamanyń ekonomıkalyq negizin kúsheıtedi.
Qazaqstan qor bırjasy jańa naryqqa bet túzedi
Degenmen, eýromen esep aıyrysý engizý týraly usynys ázirge aldyn ala sıpatqa ıe. Bul sheshim jan-jaqty taldaýdy talap etedi. Atap aıtqanda, ekinshi deńgeıli bankter men ınstıtýsıonaldyq ınvestorlar tarapynan turaqty suranystyń bolýy, klırıng, depozıtarıı jáne tólem júıelerin qamtıtyn tehnıkalyq ınfraqurylymnyń daıyndyǵy, sondaı-aq tıisti retteýshi organdardyń kelisimi eskerilýi tıis.
KASE sıfrlyq qarjy quraldaryn engizýdi aıaqtap qaldy
Jobany iske asyrýdyń naqty merzimi ázirge belgilenbegen. Ol atalǵan faktorlardy keshendi baǵalaý nátıjesine baılanysty anyqtalady. Sarapshylardyń pikirinshe, eýromen esep aıyrysý engizilgen jaǵdaıda, bul qadam KASE-niń halyqaralyq naryqtarmen yqpaldastyǵyn arttyryp, ınvestorlar úshin qosymsha múmkindik usynýy múmkin.