Qazaqstandaǵy konstıtýsııalyq reformalar – álemdik geosaıası ahýal talaptaryn eskere otyryp, múmkindikterdi tıimdi paıdalaný arqyly damýdyń tyń baǵytyn aıqyndaıtyn mańyzdy qadam. Bul týraly Konstıtýsııalyq komıssııa múshesi, «AMANAT» partııasy Qaraǵandy oblystyq fılıalynyń Tóraǵasy Bekzat Altynbekov málimdedi, dep habarlaıdy Egemen.kz.
B.Altynbekovtyń aıtýynsha, árbir ózgeristiń óz máni men mańyzy bar, al bul qadam – el sanasynyń jańǵyrýynyń aıqyn kórinisi.
«Qyzylordada ótken Ulttyq Quryltaıdyń V otyrysynda kún tártibine múlde tyń bastamalar kóterilip, bolashaqtyń jarqyn baǵdary naqtylandy. Quryltaı otyrysynda Memleket basshysy Qasym-Jomart Toqaev «Qazaqstan halqy Assambleıasy men Ulttyq Quryltaıdyń tarıhı mán-mańyzy zor ári aıryqsha jaýapty mıssııalary tabysty aıaqtaldy dep sanaýǵa bolady. Endi jańa ınstıtýt retinde Qazaqstannyń Halyq Keńesin qurýdy usynamyn» dep tarıhı málimdeme jasady. Al, Konstıtýsııalyq reforma jónindegi komıssııanyń múshesi retinde men osy Halyq Keńesiniń quqyqtyq múmkindikteri men qyzmeti Ata zańymyzdyń jańa redaksııasynda jan-jaqty naqtylaný kerek dep sanaımyn», dedi ol.
Maksım Rojın: Halyq keńesi – jalpyulttyq dıalogtyń jańa formaty
Sonymen qatar, Bekzat Altynbekov Komıssııa múshesi retinde birqatar usynystarǵa erekshe nazar aýdaryp, qoldaýyn bildirdi. Olardyń ishinde «Halyq Keńesi halyqtyń múddelerin qorǵaıtyn joǵary konsýltatıvtik organ bolyp tabylady» jáne «Halyq Keńesiniń quramy Qazaqstan azamattarynan jasaqtalady» degen normalar bar.
«Ortaǵa salynǵan usynystardy qoldaımyn. Jańǵyrý dáýirinde asa zor tarıhı mıssııany atqarýǵa Halyq Keńesiniń qyzmeti men ókilettigi, quqyǵy men mindetteri osylaısha Ata zańymyzda naqtylanǵan jaǵdaıda ǵana onyń qyzmeti baıandy da nátıjeli bolary sózsiz. Ázirge meniń usynysym – osy», dep sózin túıindedi Bekzat Altynbekov.
S.Ponomerev: «Taza Qazaqstan» – Konstıtýsııadaǵy jańa jaýapkershilik ólshemi