Astanada «Taza Qazaqstan» ekologııalyq aksııasy aıasynda kezekti tazalyq jumysy júrgizildi. Almaty aýdanynyń ákimdigi men «Astana jastary» jastar resýrstyq ortalyǵynyń bastamasymen qolǵa alynǵan is-shara Mahtumquly kóshesi boıynda ótkizilip, oǵan belsendi jastar men eriktiler qatysty, dep habarlaıdy Egemen.kz.
Tazalyq barysynda qatysýshylar kósheler men qoǵamdyq aýmaqtardy qoqystan tazartyp, qorshaǵan ortanyń tazalyǵyn saqtaýǵa óz úlesin qosty. Uıymdastyrýshylardyń aıtýynsha, mundaı bastamanyń basty maqsaty – qalanyń sanıtarlyq jaǵdaıyn jaqsartý ǵana emes, turǵyndar arasynda ekologııalyq mádenıetti qalyptastyryp, qorshaǵan ortaǵa jaýapkershilikpen qaraýdy dáripteý.
«Búgin «Taza Qazaqstan» ekologııalyq bastamasy aıasynda «Astana jastary» uıymy Almaty aýdany ákimdigimen birlesip, senbilik ótkizip jatyr. Is-sharanyń negizgi maqsaty – elordamyzdyń tazalyǵyn saqtaýǵa úles qosý jáne turǵyndar arasynda qorshaǵan ortaǵa uqypty qaraý mádenıetin qalyptastyrý. Qalanyń tazalyǵy árbir azamattyń ortaq jaýapkershiligi. Osy arqyly astanalyqtardy qalany taza ustaýǵa úndegimiz keledi. Sonymen qatar, eriktilerdiń belsendiligin arttyrý úshin tazalyq jumysyn túrli oıynmen jáne tanymdyq ádistermen ushtastyryp, senbilikti erekshe formatta uıymdastyrdyq», dedi «Astana jastary» jastar resýrstyq ortalyǵynyń bólim basshysy Sultan О́mirǵalıev.
Astana Half Marathon qatysýshylary «Taza Qazaqstan» aksııasyn qoldap, ploggıng ótkizdi
Senbilikke qatysqan jastar mundaı jumystardyń qoǵam úshin mańyzy zor ekenin atap ótti. Olardyń pikirinshe, qalanyń tazalyǵy ár turǵynnyń mádenıeti men jaýapkershiliginen bastalady.
«Astana Jastary volonterlik uıymynyń qataryna qosylǵanyma bir jylǵa jýyq ýaqyt boldy. Osy aralyqta túrli ekologııalyq jáne qoǵamdyq is-sharaǵa belsendi qatysyp kelemin. Búgingi senbilikke de jazǵy demalysymyzdy paıdaly ótkizip, qalamyzdyń tazalyǵyna úlesimizdi qosý úshin keldik. Biz shashylǵan qoqysty jınap qana qoımaı, qorshaǵan ortaǵa uqypty qaraýdyń mańyzyn nasıhattaýǵa tyrysamyz. Astananyń tazalyǵy – tek kommýnaldyq qyzmettiń emes, árbir turǵynnyń ortaq jaýapkershiligi. Sondyqtan ár azamat qorshaǵan ortany taza ustap, qoqys tastamaýdy ádetke aınaldyrýy qajet dep oılaımyn», dedi Astana Jastary volonterlik uıymynyń múshesi Ábilmansur Ámirhan.
Erlan Qarın: «Taza Qazaqstan» jalpyulttyq qoǵamdyq qozǵalysqa aınaldy
Aıta keteıik, Májilis depýtaty «Taza Qazaqstan» jalpyulttyq qozǵalysyn qurýdy usyndy.