Álemdegi eń qaýipti áýejaı retinde tanylǵan Nepaldyń Lýkla qalasynda ornalasqan Tensıng-Hılları áýejaıynyń ushý-qoný jolaǵynyń uzyndyǵy nebári 527 metrdi, al eni 20 metrdi quraıdy, dep habarlaıdy Egemen.kz.
Salystyrmaly túrde aıtsaq, kóptegen halyqaralyq áýejaıdyń ushý-qoný jolaǵynyń uzyndyǵy 3 myń metrden asady. Lýkla áýejaıynyń taǵy bir ereksheligi – ushý-qoný jolaǵynyń 12 paıyzdyq eńisi. Bul ushaqtardyń qoný kezinde jyldamdyǵyn azaıtýǵa kómektesedi. Degenmen munda qatelikke oryn joq. Ushaq tym uzap ketse, taý betkeıine soǵylady, al qonýǵa erte tómendese, tereń jartastan qulap ketý qaýpi bar.
Statıstıkalyq málimetterge súıensek, áýejaı ashylǵannan beri munda 7 iri apat tirkelip, 56 adam qaza tapqan. Qaýipti jaǵdaı tek qysqa ushý jolaǵymen shektelmeıdi. Bıik taýly aımaqta aýa tyǵyzdyǵynyń tómen bolýy ushaq qozǵaltqyshtarynyń jumysyna áser etedi. Sonyń saldarynan ushaqtardyń kóterilýi men tejelýi kúrdelene túsedi.
Kongoda áýejaı qaıta ashyldy
Sonymen qatar Gımalaı óńirindegi aýa raıy qubylmaly keledi. Aspan ashyq bolyp turyp birneshe mınýttyń ishinde qalyń tuman túsip nemese qar jaýyp ketýi múmkin. Mundaı jaǵdaılarda ushaqtar keri burylyp, Nepal astanasy Katmandýǵa qaıtýǵa májbúr bolady. Mamandardyń aıtýynsha, mýsson maýsymynda josparlanǵan reısterdiń shamamen jartysy aýa raıynyń qolaısyzdyǵyna baılanysty keıinge shegeriledi nemese toqtatylady. Soǵan qaramastan týrıstik maýsym kezinde áýejaıda kúnine 50-ge deıin reıs oryndalady. Mundaı baǵytta tájirıbesiz ushqyshtardyń jumys isteýine ruqsat berilmeıdi.
Nepaldyń avıasııalyq talaptaryna sáıkes, Lýklaǵa ushatyn ushqyshtardyń keminde bir jyldyq jergilikti tájirıbesi bolýy kerek. Sonymen qatar olar 100-den astam qysqa qashyqtyqtaǵy ushý men qonýdy oryndap, nusqaýshymen birge 10 sátti jattyǵý reısinen ótýge mindetti.
Janasyl ZAITIMHAN,
EUÝ stýdenti