Qazaqstan ǵylym men ınnovasııa salasyndaǵy Eýropalyq odaqtyń eń iri baǵdarlamalarynyń biri Horizon Europe baǵdarlamasyna qaýymdastyrylǵan el mártebesimen qosylýdy josparlap otyr, dep habarlaıdy Egemen.kz
Baǵdarlamanyń jalpy bıýdjeti 175 mıllıard eýrony quraıdy. Oǵan qatysý qazaqstannyń joǵary oqý oryndary men ǵylymı-zertteý ınstıtýttaryna halyqaralyq granttarǵa qol jetkizýge múmkindik ashyp, ǵylym men bilim berý salasynyń damýyna tyń serpin berýi múmkin.
Bul másele Qazaqstannyń Ǵylym jáne joǵary bilim mınıstri Saıasat Nurbektiń Eýropalyq odaq ókilderimen, Brıýssel dıplomatııalyq akademııasynyń basshylyǵymen jáne birqatar jetekshi ýnıversıtetterdiń ókilderimen kezdesýi barysynda talqylandy.
Mınıstrdiń aıtýynsha, Qazaqstannyń maqsaty Horizon Europe baǵdarlamasyna tolyqqandy qatysýshy retinde qosylý.
«Bul ońaı prosess emes. Qazirgi tańda baǵdarlamaǵa Eýroodaqqa múshe emes Japonııa, Ońtústik Koreıa jáne Avstralııa sekildi iri memleketter qatysyp otyr. Biz daıyndyq jumystaryn bastap kettik. Eýropalyq komıssııanyń birneshe qurylymy bul bastamaǵa qoldaý bildirdi», dedi Saıasat Nurbek.
Kezdesý barysynda dıplomatııalyq kadrlardy daıarlaý jáne akademııalyq yntymaqtastyq máseleleri de sóz boldy.
Brıýssel dıplomatııalyq akademııasynyń dırektory Gýnter Habblom Qazaqstanmen áriptestikti damytýǵa qyzyǵýshylyq tanytatynyn atap ótti.
«Biz Qazaqstannyń dıplomatııalyq korpýsyn kásibı daıarlaý máselesin talqyladyq. Brıýssel dıplomatııalyq akademııasy álemdegi eń myqty baǵdarlamalardyń birine ıe jáne tájirıbelik daıyndyqqa erekshe kóńil bóledi. Sonymen qatar Ortalyq Azııany zertteý baǵytyn damytyp, óńirdegi mańyzdy memleketterdiń biri retinde Qazaqstanǵa erekshe nazar aýdarǵymyz keledi», dedi Gýnter Habblom.
Taraptar aldaǵy ýaqytta ǵylym, bilim jáne dıplomatııalyq kadrlardy daıarlaý baǵytyndaǵy yntymaqtastyqty odan ári keńeıtýge nıetti ekenin jetkizdi.