Sońǵy úsh apta ishinde Aqtóbede bir jylǵa jýyq jaýyn-shashyn normasy tústi. Sonyń saldarynan aýlalar men joldardy sý basyp, sý júıeleri nóserdi ótkize almaı jatyr, dep habarlaıdy Egemen.kz
Aqtóbede kún saıyn derlik jańbyr jaýyp tur. Keı kezderi nóser jańbyr burshaqpen jáne naızaǵaımen qatar júrýde.
8 maýsym kúni az ýaqyt ishinde qala kósheleri ózenge aınaldy. Turǵyndar sý keship júrýge májbúr bolsa, kólikter úlken shalshyqtardan áreń ótýde.
Turǵyndardyń aıtýynsha, ásirese qala ortalyǵy sý astynda qalyp otyr. Jınalǵan sý ýaqytynda tartylmaıdy, al nóser sý júıeleri bar jerlerde de olardyń múmkindigi jetkiliksiz.
Qala ákimdiginiń málimetinshe, sońǵy kúnderi jaýǵan jaýyn-shashyn mólsheri qalanyń nóser sý júıesine aıtarlyqtaı salmaq túsirgen.
Qazirgi ýaqytta qala kóshelerinde 110 assenızatorlyq kólik, bes sorǵy stansasy jáne motopompalar jumys istep jatyr. Eń aldymen kósheler men joldardaǵy sý sorylyp alynýda.
«Kópqabatty turǵyn úılerdiń aýlalarynan sýdy shyǵarý jumystaryn páter ıeleri kooperatıvi men múlik ıeleri birlestigi tóraǵalary turǵyndarmen birlesip uıymdastyrýy tıis. Jaýyn sýyn aǵyzý úshin arnaıy 30 oryn belgilendi», dep habarlady qala ákimdiginiń baspasóz qyzmeti.
«Qazgıdromet» boljamyna sáıkes, óńirde nóser jańbyr aptanyń sońyna deıin jalǵasady.