Májilis depýtaty Nursultan Baıtilesov Memleket basshysynyń «Ana tili» gazetine bergen suhbatyna oraı Facebook áleýmettik jelisinde pikir bildirdi, dep habarlaıdy Egemen.kz.
«Búgin Prezıdent Qasym-Jomart Toqaevtyń «Ana tili» gazetine bergen suhbaty jarııalandy. Memleket basshysy óz sózinde el damýynyń negizi retinde «Zań men tártip» qaǵıdatyn atap ótip, ádildik pen birlikti saqtaý qajettigine erekshe toqtaldy. Prezıdent zań ústemdigin demokratııanyń eń joǵary shyńy dep sanaıtynyn naqtylap, esirtki qylmysy, oıynqumarlyq, buzaqylyq jáne vandalızmge qatysty jazanyń qatańdatylýy qoǵamdaǵy tártip pen ádilettilikti nyǵaıtýǵa baǵyttalǵan mańyzdy qadam ekenin atap ótti. Sonymen qatar azamattardyń quqyqtaryn qorǵaý úshin 2025 jyldan bastap úsh derbes kassasııalyq sot qurylatynyn jetkizdi», dep jazdy N. Baıtilesov.
Sondaı-aq Prezıdent «Keleshek» biryńǵaı erikti jınaqtaý júıesin engizý arqyly halyqqa bilim alý jáne turǵyn úı satyp alý múmkindikterin keńeıtýge erekshe nazar aýdardy. Ol azamattardyń artyq nesıelenýin azaıtýǵa baǵyttalǵan zańnyń da mańyzdylyǵyn atap ótip, bul bastama qarjylyq turaqtylyqty qamtamasyz etýde mańyzdy ról atqaratynyn naqty aıtty. Memleket basshysy medısına qyzmetkerleriniń quqyqtyq qorǵalýy men áleýmettik kepildikteriniń kúsheıtilgenin de tilge tıek etti. Sonymen qatar zańdardyń tıimdiligi olardyń is júzinde qanshalyqty durys oryndalýyna baılanysty ekenin basa aıtyp, quqyqtyq júıeni jetildirý jumystary jalǵasa beretinin jetkizdi.
«Memleket basshysynyń bastamalary eldiń turaqty damýyn qamtamasyz etýge jáne ádiletti qoǵam qurýǵa baǵyttalǵan. Prezıdenttiń syndarly ustanymdary men reformalaryn qoldaý arqyly biz Táýelsiz Qazaqstannyń jarqyn bolashaǵyna senimdi qadam jasaımyz», dep jazdy depýtat.