Ortalyq saılaý komıssııasy tóraǵasynyń orynbasary Vladımır Foos Eýropalyq Odaqtyń Ortalyq Azııa boıynsha arnaıy ókili Per Morel bastap kelgen delegasııa múshelerimen kezdesti.
OSK tóraǵasynyń orynbasary delegasııa múshelerin Ortalyq saılaý komıssııasynyń jumysymen jáne saılaý naýqanynyń negizgi kezeńderimen tanystyrdy. Sonymen qatar, ol delegasııa quramynyń kezekten tys prezıdenttik saılaýda kandıdattardy usyný jáne tirkeý tártibine, saılaý komısııalaryn qalyptastyrý men OSK-niń olarmen ózara árekettestigine, saıası partııalar men respýblıkalyq qoǵamdyq birlestikterdiń saılaý komıssııalarynda ókildik etýine, buqaralyq aqparat quraldarynyń barlyq kandıdattardyń BAQ-tarǵa teń qol jetkizýin qamtamasyz etý boıynsha zań talaptaryn oryndaýyna, shet memleketterde Qazaqstan Respýblıkasy azamattarynyń daýys berýin uıymdastyrýǵa, sondaı-aq shaǵymdar men ótinishterdi berý jáne olardy qaraý úderisterine qatysty qoıǵan suraqtaryna jaýaptar qaıtardy.
– Eýropalyq Odaq azamattardyń negizgi quqyqtarynyń iske asyrylý máselelerine úlken qyzyǵýshylyq tanytady jáne ulttyq saılaýlardy osylardy júzege asyrýdyń mańyzdy tetigi dep qaraıdy, – deı kelip, Per Morel saılaýdy uıymdastyrýshylardyń elektoraldyq naýqandy tabysty ótkizýine tilektestigin bildirdi.
Álısultan QULANBAI.