Sońǵy kezderi Qazaqstan úshin daýryqpa áńgimeden basqa eshteńe jasap kórmegen bireýlerdiń saılaýǵa boıkot jarııalaýǵa shaqyrý jónindegi alypqashpa áńgimeleri estile bastady. Bul – esti kisiniń, osy elge bolsyn deıtin, memleketimiz óssin, órkendesin deıtin azamattardyń aıtar áńgimesi emes, el ishin alataıdaı búldiretin attóbelindeı toptyń aıqaıy bolsa kerek.
Qazaqstan halqy saılaýda daýys berý múmkindigin paıdalanýy kerek.
Táýelsizdik alǵanymyzǵa endi jıyrma jyl tolyp otyr. Bajaılap qarasaq, keshe kim edik, búgin kimbiz? Kórshi jurttar Qazaqstannyń ótken ǵasyrdyń aıaǵynda tap bolǵan qıynshylyqtarynan áli kúnge deıin batpaqtap shyǵa almaı jatyr. Jylan jalaǵandaı dúkender, qańyrap qalǵan aýyldar men qalalar, bolashaqqa senimsizdeý qaraǵan kúnder, náýmez urpaq taǵdyryn qalaı esten shyǵarýǵa bolady.
Jıyrma jylda keıbir memleketterdiń júz jylda alatyn asýlaryn aldyq, belesterden óttik. Memleketimiz dúnıejúzilik moıyndaýǵa ıe boldy. Kóp elder bizdiń elge qarap boı túzeı bastady.
Jyl basyndaǵy Qysqy Azıadaǵa qatysqan qyrǵyz sportshylarynyń: “Qazaq bolý qandaı baqyt”, degenin “Egemen Qazaqstannan” oqyp mereılenip qaldyq.
El aman, jer aman, jurt tynysh. Halqynyń jaǵdaıy búgingiden de jarqyn bolsyn deseń, saılaýǵa bar. Ol – seniń azamattyq paryzyń. Kóldeneń kók attynyń qyzdyrma sózine ermeı, tańdaýyńdy jasaıtyn quqyǵyńdy paıdalan. О́ıtkeni, Qazaqstan bárimizdiń birtutas shańyraǵymyz.
Ábdirahman OMBAEV, Memlekettik syılyqtyń laýreaty, aýyl sharýashylyǵy ǵylymdarynyń doktory.
Shymkent.