Bir aıda birneshe altyn

Jaqynda bokstan Qazaqstan quramasy Belgrad, Almaty, Baký jáne Tashkent qala­larynda ótken tórt birdeı halyqaralyq týrnırge qatysty. Serbııanyń astanasy – Belgradta ótken týrnırde 81 kg. deıingi salmaqta kúsh synasqan Azamat Belgibaev pen 69 kg. salmaqtaǵy Manat О́mirzaqov bas júldeni jeńip aldy. Azamat jartylaı fınalda álemniń úzdik boksshy­lary­nyń biri sana­latyn 2009 jyly Mılanda ótken álem chem­pıo­natynyń kúmis júldegeri, 2010 jylǵy Gýanch­joý­daǵy Azııa oıyn­dary­nyń je­ńim­pazy ózbek Dılshot Rasýlovpen kezdesip, ony nokaýtqa jiberdi. Manat О́mirzaqov ta jar­tylaı fınalda qarsy­la­syn ońdyrmaı utty. Al fınalda qos boksshymyz Vengrııanyń ókilderinen basym tústi. Osy týrnırde jastar arasyndaǵy Azııa chempıony Nur­bol Qaljanov (56 kg.), Chehııada ótken halyqara­lyq týrnırdiń jeńimpazy Samat Báshenov (60 kg.), bıylǵy el chempıonatynyń kúmis júldegeri Almasbek Álimbekov (64 kg.) jáne asa aýyr salmaq­taǵy Rústem Irgebaev jartylaı fınalda qarsy­lastarynan utylyp, qola júldeni qanaǵat tutty. Odan keıin Almatydaǵy jyl saıyn Uly Otan soǵysynyń ardageri, Keńes Odaǵynyń Batyry, Ha­lyq Qaharmany   Saǵadat Nurma­ǵam­­betov týrnırine qatysqan bylǵary qolǵap sheberlerimiz 11 eldiń boksshylarymen ju­dyryq­ta­syp, 9 altyn jáne 4 kúmis medaldi ıelendi. Solardyń ishinde 52 kg. sal­maqta kúsh synasqan tarazdyq Oljas Sáttibaevtyń ónerine Alma­ty­daǵy «Dostyq» sport keshenine jıylǵan jan­kúıerler qol soq­ty. Tarazdyq boksshy fınalda Azamat Úsená­lıev­pen (Qyr­ǵyzstan) qolǵap tú­ıis­tirdi. Onyń aldynda úndi Harıjan Santosh­ty jeńgen Oljas qyrǵyz boksshysyn 15:12 esebimen tize búk­tirdi. Odan keıin týrnırde eń jeńil sal­maqtaǵy Birjan Jaqypov (49 kg.), 56 kg.-daǵy Almas Ja­qypov, Bekman Soılybaev (60 kg.), Batyrjan Júkenbaev (64 kg.), Serik Sápıev (69 kg.), Ádilet Nııazymbetov (81 kg.) jáne asa aýyr salmaqtaǵy Ivan Dychko jeńimpaz atandy. Ázirbaıjannyń Baký qalasynda bokstan jas­ós­pirimder arasynda ótken týrnırde bizdiń qu­ra­ma 3 altyn, 2 kúmis jáne 3 qola medaldi je­ńip al­dy. Osy eldiń tuńǵysh prezıdenti, kórnekti mem­leket qaıratkeri Geıdar Álıev kýbogy úshin ótken básekege alys-jaqyn shetelderden kóptegen komandalar qatysty. Olardyń arasynda Irlandııa, Shotlandııa, Túrkııa, Tájik­stan, Túrkimen­stan, О́zbekstan, Ýkraına, Grýzııa jáne bizdiń elden barǵan balǵyn boksshylar qolǵap túıistirip, óz qurdastary arasynda eń myqtyny anyqtady. Bul synda Qaıyrgeldi Dáýitbek (63 kg.), Aqylbek Ádilǵalıev (66 kg.), Dıdar Tólegen (80 kg.-dan joǵary) birinshi oryndy ıelense, Oljas Qalaýbek (46 kg.) pen Bekjan Qybyt­qalıev (54 kg.) kúmis medaldi, Almas Shyn­temiruly (50 kg.), Tilek Qozbaqov (80 kg.) jáne Eldos Qadyrbaev (80 kg.-dan joǵary) qola júldeni ıelendi. Dastan KENJALIN.