...ÚIDIŃ MEKEN-JAIY: ASTANA KО́ShESI, №1
О́ndiristi qala Aqsýda bos qalǵan jataqhana iske jarap, sonyń negizinde taǵy bir turǵyn úı boı kóterdi. Bul qýanyshty rásimge oblys ákimi Baqytjan Saǵyntaev pen osy úıdi turǵyzýǵa atsalysqan «ENRC» PLC kompanııasy basshylary qatysyp, osy jerdegi «Eýrazııalyq energetıkalyq korporasııasy» AQ qyzmetkerleri men jumysshylaryna 70 páterdiń kiltterin tapsyrdy.
Ásirese, óndiriske jańa kelgen jastar qýanyshty. Páterler nesıe arqyly 15 jylǵa 1 paıyzdyq ústememen berilip otyr. Úı aýlasy keń, kógaldandyrý jumystary erte bastan qolǵa alynǵan. «ENRC» PLC bas atqarýshy dırektory Felıks Výlıs biz úshin áleýmettik máselelerdiń sheshilýi basty másele, ol senimdilik pen turaqtylyqtyń kepili, deıdi.
Jalpy, sońǵy alty jylda korporasııa turǵyn úı baǵdarlamasyn júzege asyrý úshin 1,7 mıllıard teńge jumsap, 500-ge jýyq páter ıeleri qonys toıyn toılapty.
Farıda BYQAI.
Pavlodar oblysy.
* * *
...BALABAQShANYŃ IRGETASY QALANDY
Qyzylorda qalasynyń «Saıahat» shaǵyn aýdanynda jańa balabaqshanyń irgetasyn qalaý rásimi ótti. Oǵan oblys ákimi Bolatbek Qýandyqov qatysty. 280 oryndyq balabaqshanyń qurylysyn «TehservısQyzylorda» JShS qolyna alǵan. Atalǵan seriktestiktiń dırektory Marat Jabbarbergenov aımaq basshysyn nysannyń qurylysymen jáne tehnıkalyq sıpattamasymen tanystyrdy. Shara sońynda qurylys nysanymen tanysyp bolǵan oblys ákimi jańa balabaqshanyń alǵashqy irgetasyn, ıakı alǵashqy kirpishin qalap, qurylysshylardyń jumysyna sáttilik tiledi.
Bıyl jyl basynan beri oblys sheńberinde 4 balabaqsha paıdalanýǵa berildi.Jyl sońyna deıin qalada taǵy osyndaı 3 balabaqsha balǵyndardyń ıgiligine tabystalady dep kútilýde. Balabaqshalar tek qalamyzda ǵana emes, aýdandar men eldi mekenderde de salynýda. El Táýelsizdiginiń 20 jyldyǵy merekesi qarsańynda oblysymyzda bıyl taǵy 10 balabaqsha irge kótermek.
Qyzylorda.
* * *
...BANK FILIALY AShYLDY
Aqtóbe qalasynda Reseıdiń «VTB» bankiniń fılıaly óziniń tusaýkeserin ótkizdi. Kórshiles eldiń qarjy qurylymynyń Qazaqstan rynogynda óz qyzmetin bastaǵanyna eki jyl. Bank fılıaly Ábilqaıyr han dańǵyly boıyndaǵy «Halyq banki» fılıalynyń burynǵy ǵımaratynda ornalasqan.
Reseıdegi eń iri bankterdiń biri – «VTB» banki qazir álemniń jıyrma elinde jumys isteıdi. Búgingi tańda bank elimizdiń bes qalasynda óz fılıaldaryn ashqan. Ol turǵyndarǵa kepilsiz nesıe berý, salym salý, shaǵyn bıznesti damytýǵa qarjy bólý qyzmetterin usynady. «VTB» AQ enshiles uıymynyń basqarma tóraǵasy Sergeı Gýsarovtyń málimdeýinshe, bank qala turǵyndaryna tıimdi qyzmetter usynyp, bıznestiń barlyq baǵyttary boıynsha belsendi jumys isteıtin bolady. Bul – oblys aýmaǵynda óziniń qarjy qyzmetin usynyp otyrǵan Reseıdiń ekinshi banki.
Satybaldy SÁÝIRBAI.
Aqtóbe oblysy.