Er esimi – el esinde!

Almaty qalasyndaǵy 28 Gvardııashy-panfılovshylar saıabaǵynda Re­seı­diń Rjev qalasyndaǵy «Baýyrlastar zıratynan» ákelingen topy­raq­ty jer qoınyna ornalastyrý sharasy ótti. Sharaǵa qala ákimi A.Esimov, «Nur Otan» HDP Almaty qalalyq fılıalynyń tóraǵasy M.Beıdaly, sondaı-aq Uly Otan jáne Aýǵanstan soǵystarynyń ardagerleri men Reseı, Ýkraına jáne Belarýs elshilikteriniń ókilderi qatysty. 1945 jyly aıaqtalǵan Uly Otan soǵysynyń bastalǵanyna 70 jyl tolýyna oraı uıymdasty­ryl­ǵan bul sharada Almaty qala­synyń ákimi A.Esimov sóz sóılep, erlikpen qaza tapqan jaýyngerler rýhyna qurmet retinde ashylǵan memorıaldy taq­tanyń ashylý rá­si­min atqardy. Me­morıaldy taqta astyna Reseı jerinen, «Baýyr­las­tar zıratynan» áke­lingen topyraq arnaıy qutyǵa saly­nyp qoıyldy. Osyndaı taǵy bir qutydaǵy topyraq bir top alpınısterge berilip, olar ony Uly Otan soǵysy atyndaǵy shyńǵa aparyp qoıatynyn málimdedi. 1941 jyly Almaty men Aqtóbe qalalarynda ulttyq atqyshtar brı­ga­d­asy jasaqtalǵan bolatyn. 1942 jyly sol qazaqstandyq brıgada Kalının maıdanynda júrip jatqan ala­pat soǵysqa kirdi. Osydan eki jyl buryn sol 1942 jyldyń qara­sha-jeltoqsanynda Rjev qalasynyń túbinde asa qupııa túrde júrgizilgen «Mars» operasııasynyń qujattaryn izdeýge arnaýly top qurylyp, erlikpen qaza tapqan jáne iz-túzsiz joǵa­lyp ketken jaýyngerlerimiz týraly kóptegen málimetter tapqan. Sóıtip, Qazaq eli kóptegen batyr uldarymen tabysqan-dy. 2010 jyly Uly Otan soǵy­syn­daǵy Jeńistiń 65 jyldyǵyn atap ótý aıasynda Elbasy N.Nazar­baevtyń tap­sy­rýymen Rjev qalasyn­da qazaqstan­dyq 100-101 arnaıy at­qyshtar brıga­da­sy jaýyngerleri qur­metine memo­rıaldy keshen ornatyl­dy. Almaty­daǵy 28 Gvardııashy-pan­fılovshylar saıabaǵynda ótkizilgen bul shara búgingi beıbit ómir úshin janyn qıǵan, jas­tyǵyn bergen erlerge degen qurmettiń qashanda jalǵasyn tabatyndyǵynyń aıǵaǵy. Sondaı-aq, bul kúni saıabaqtaǵy «Máńgilik alaýǵa» Uly Otan soǵysy ardagerleri men Aýǵanstan soǵysy ardagerlerinen ózge, elshilikterdiń ókil­deri, túrli partııalar men qoǵamdyq uıymdar músheleri gúl shoqtaryn qoıdy. Qanat ESKENDIR. Almaty.