23 maýsymda Parlament Májilisi Apparatynyń ákimshilik memlekettik qyzmetshileriniń ant berý rásimi ótti, dep habarlady osy palatanyń baspasóz qyzmeti.
Saltanatty rásimdi Apparat basshysy Ergen Doshaev kirispe sózben ashty. Al qoǵam men memleket tarapynan aıryqsha senim bildirilgen táýelsiz Qazaqstannyń qyzmetkerleri ózderiniń bıik jaýapkershiligin sezine otyryp bergen antynda Qazaqstan halqyna adaldyq tanytyp, Prezıdenttiń saıasatyn biliktilikpen júrgizetindikterin málimdedi.
Ant berýshi jastardy aǵa býyn atynan Májilis depýtaty Zeınolla Alshymbaev quttyqtap, óziniń uzaq jyldarǵy memlekettik qyzmet tájirıbesinen áńgime aıtyp berdi. Ant berýshi jas mamandar atynan Halel Ybyraı sóz alyp, áriptesterine aldaǵy memlekettik qyzmet isinde qajyr-qaırat, biliktilik tiledi.