Bir súıinish, bir kúıinish

Fransııanyń Parıj qalasynda dzıýdodan ótip jatqan álem chempıonatynda 73 kg. salmaqtaǵy ulttyq quramanyń múshesi Rınat Ibragımov London Olımpıadasyna joldama aldy. Bul bizdiń álem chempıonaty bastalǵaly beri qorjynymyzǵa túsken alǵashqy joldamamyz. Onyń ózinde Ibragımov úshinshi oryn úshin bolǵan synda parter ıesi Ýgo Legrannan jeńilip, óz salmaǵynda Olımpıadaǵa beriletin orynnyń bireýine ıe boldy. Jarysta bizdiń taǵy bir balýanymyz Eldar Zapırhanov ta osy fransýzǵa jol berdi. Al basqa balýandarymyz qazir shetinen jeńi­lip jatyr. Shyndyqtyń betine qarasaq, álem chempıonaty bas­talǵaly beri júldege úmitkerlerdiń báriniń qarsylastaryna kúshi jetpeı jatqanyn aıtý kerek. Eń áýeli 60 kg. salmaqty Eldos Ismetov utylsa, odan keıin Erkebulan Qosaev bir kezdesýde jeńip, ekinshisinde reseılik Arsen Galstıanǵa ese jiberdi. Al 66 kg. salmaqtaǵy Azamat Muqanov jarysty jaqsy bastaǵan edi. Ol kanadalyq Mıshel Popıeldi jeńip, shırek fınalǵa shyǵarda reseılik Musa Mýgýshovtan jeńilip qaldy. Sol sııaqty Naýryzbek Maılashov ta jarysty sátti bastap, eń sońyna kelgende qarsylasyna shamasy jetpedi. Ol sońǵy synda fransýz Damıd Larosqa jol berdi. Qyzdar arasyndaǵy báseke de qyza túsýde. Biraq bizdiń qura­manyń qyzdary da erler sııaqty birinen soń biri jeńilistiń dámin tatyp jatyr. Álem chempıonatynyń alǵashqy kúni 48 kg.-daǵy Aleksandra Podrıadova bir kezdesýin jeńip, ekinshisinde, qarsyla­syna ese jiberdi. Kelbet Nurǵazına, Lenara Mengazova, Amına Ten de sonyń jolyn qaıtalady. Endi bizdiń quramada Áıgerim Qydyr­baeva men Zarına Aldınova kúsh synasady. Al erler arasynda parterge Saıat Shámshıev, Islam Bozbaev, Tımýr Bolat pen Aleksandr Kasachev shyǵady. Dastan KENJALIN.