Ekonomıkalyq áriptestiktiń áleýeti zor

Keshe Aqordada Elbasy Nursultan Nazarbaev «SITIK GROUP» kompanııasynyń bas dırektory Tıan Gýolıdi qabyldady.  

«SITIK GROUP» – Qytaıdyń halyqaralyq trast jáne ınves­tısııa jónindegi memlekettik kompanııasy. Kompanııa eldiń Memkeńesine tikeleı baǵynady. Onyń jumys baǵyttary kóp, sonyń ishinde qarjy, energetıka jáne resýrstar, ınfraqurylym, áýe kóligi, halyqaralyq ınjınırıng, máshıne jasaý, aqparat jáne t.b. salalar bar. Kompanııanyń 40-tan astam enshiles kásip­oryn­dary jáne fılıaldary tirkel­gen. Sonyń ishinde 11-i Amerıka, Avstralııa sekildi shet elderde jumys isteıdi. Onyń jalpy kapıtaly 122 mlrd. AQSh dollaryn quraıdy, qaramaǵynda 70 myń­nan artyq adam eńbek etedi.

Qazaqstanda bul kompanııa munaı-gaz kesheni salasynda yn­tymaqtastyq ornatqan. «Qara­jam­b­asmunaı» AQ-tyń 50 paı­yz­dyq úlesi osy kompanııanyń ıeliginde, al qalǵany «Qaz­Mu­naıGaz» UK» AQ-tyń quzyrynda. Kompanııa Aqtaýda jol bıtýmy zaýytyn salýdy qolǵa alǵan.

Elbasy men kompanııa bas­shy­sy­nyń kezdesýi kezinde ın­ves­tı­sııalyq yntymaqtastyqtyń bir­qa­tar  máseleleri talqylandy. Kez­desýden shyqqan soń Tıan Gýolı jýrnalıstermen shaǵyn brıfıng ótkizdi.

– Bul meniń Qazaqstanǵa ja­saǵan alǵashqy saparym. Biz osyn­daǵy ózimiz bolǵan barlyq jerde de qurylys alańdaryn, munara­lardy kórdik. Bul – qazaqstandyq ekonomıkanyń ser­pin­di damyp otyr­ǵandyǵynyń belgisi. Osy kó­rinis Qytaıda reformalar men ashyqtyq saıasaty bastalǵan jáne ekonomıkamyz­dyń shapshań damı bastaǵan ke­ze­ńin eske túsiredi. Men Prezıdent Nursultan Nazarbaevpen, Premer-Mınıstr Kárim Má­si­mov­pen, mınıstrlermen, qazaq­stan­dyq kásiporyndardyń basshylarymen kezdesýim kezinde báriniń de Qazaqstan ekonomıkasynyń tamasha bolashaǵyna degen senim­derin baıqadym. Biz qazir qazaq­standyq áriptesterimizben birqa­tar bir­les­ken jobalardy júzege asyrýdamyz, – dedi.

Osy oraıda ol «Qara­jam­bas» kenishin ıgerýge qatysyp jat­qan­daryn aıtty. Munaıdan basqa biz Qazaqstannyń shı­ki­zat­tyq emes sek­torymen ynty­maq­tastyqty damytýdy qolǵa aldyq.  Bul Qazaqstan ekonomı­ka­synyń damýyna jol ashady dep sanaımyz. Sondaı-aq, Prezıdent Nursultan Nazar­baev­tyń usynysy boıynsha qazaq­stan­dyq áriptesterimizben bir­le­se otyryp, bıtým zaýyty jobasyn júzege asyryp jatyrmyz. Osy zaýytty paıdalanýǵa bergennen keıin Qazaqstan bıtýmdy syrttan tasymaıtyn bolady. Biz «Samuryq-Qazy­na­men» birlesip «Sıtık-Qazyna» birles­ken ınvestısııalyq qo­ryn qur­dyq. Onyń maqsaty – Qazaq­stan­da jáne Qytaıda, son­daı-aq bas­qa shetelderde perspektıvaly ınvestısııalyq jobalardy izdes­tirý. Meniń sapar kezindegi baı­qa­ǵanym, Qa­zaqstanda qazir shet­eldik ınvestısııalar úshin jaqsy zańdyq baza jasalǵan.  Bizdiń memle­ket­terimiz arasynda óte jaqsy saıası qatynastar, halyq­tary­myz arasynda ejelden tatý jáne jyly shyraıly kórshilik qa­rym-qatynastar ornyqqan. Mu­­nyń bári bizdiń birlesken ın­ves­tısııalarymyzdy alǵa jyl­­jy­­týǵa qyzmet etedi,  dedi T.Gýolı.

Jaqsybaı SAMRAT.