Qazaqstan-Amerıka konsýltasııalary jalǵasady

24 qyrkúıekte Nıý-Iorkte Qazaqstan Syrtqy ister mınıstriniń orynbasary Qaırat Omarovtyń jáne AQSh Memlekettik hatshysynyń Ońtústik jáne Ortalyq Azııa boıynsha kómekshisi Robert Bleıktiń tóraǵalyǵymen 2010 jyldyń naýryz aıynan  beri iske qosylǵan jyl saıynǵy Qazaqstan-Amerıka konsýltasııalar qurylymy aıasyndaǵy kelisimderdiń oryndalý barysy jaıynda josparly «saǵat týralaýy» ótti. Shara barysynda qazaqstan­dyq jáne amerıkalyq taraptar Qazaq­stan men AQSh arasyndaǵy stra­te­gııa­lyq áriptestiktiń negi­zin quraı­tyn ekijaqty konsýltasııalar te­ti­giniń  negizgi bes ba­ǵytta shıraq da­myp kele jatqanyna toqtaldy. Atap aıtsaq, olar: ja­handyq jáne aýmaqtyq qaýip­siz­dik,  saıası má­seleler, demokratııa men adam quqyqtary, ekonomıka jáne áleýmettik damý, energetıka. Sonymen birge, Q.Omarov pen R.Bleık kún tártibindegi jáne BUU Bas Assambleıasynyń 66-ses­sııasy sheńberinde Prezıdent Nursultan Na­zarbaev pen Prezıdent Barak Obamanyń ekijaqty konsýltasııalar mátinindegi qa­zir­gi zamanǵy ja­han­dyq másele­ler men aýmaqtyq qaýip­terdi she­shýdegi joldarynyń uq­sastyǵyn taǵy da rastaǵanyn atap ótti. Qazaqstan jáne Amerıka dıplomattary áńgimeniń jalǵasynda keleshekte jappaı qyryp-joıý qarýyn taratpaý jáne ıadrolyq qaýipsizdikti qamtamasyz etý, aýmaqtyq qaýipsizdik máselelerin sheshý, Aýǵanstan máselesi sııaq­ty jumystardyń birikken qa­damdaryn talqylady.