Saıramǵa barsań, dıqanmyn deme...

Uly Muhań – Muhtar Áýezov ómiriniń sońǵy jyldarynda ońtústiktiń ómirine qulaı berilipti. Ata-babasy óngen quıqa­ly topyraqty táý etip, kúrdeli shyǵarma jazbaqqa nıet qylǵan deıdi. Búgingi Báı­dibek, Sozaq aýdandaryna barǵanda kórshi eki aýdannyń erekshelikterine súı­sinip, “Shaıanǵa barsań, ánshimin deme, Sozaqqa barsań, kúıshimin deme”, degen eken. Shaıan halyq teatrynyń Odaqqa tanylǵan dańqyn eshkim umyta qoıǵan joq. Birde Báıdibek aýdanynyń sol kezdegi ákimi Ulasbek Sádibekovtiń muryndyq bolýy­men ótken ónerpazdar baıqaýyna qonaq retinde qatysyp, taý sýyndaı aryndy, keń tynysty, daýysy qulaqty kespeıtin, janǵa jaǵymdy ánderdi tyńdap otyryp, “ıapyr-aı, myna qyzdar Almaty, Asta­naǵa barsa, talaı ánshiler sahna syrtyna shyǵyp qalar-aý”, dep oı túıgen edik. Al, syrly Sozaqta, shertpe kúıdiń negizin salǵan Súgir Áliulynyń elinde kúmbirletip kúı tartpaıtyndary kemde-kem. Ońtústiktiń halqy – eńbekqor. Bireýin eki etemin dep jantalasyp júrgenin bas­qa óńirdegiler shekten tys pysyqtyqqa jatqyz­ǵa­ny­men, kóbine ketpenine jú­giretin eńbekshi halyqtyń jegen nany adal. Qaı aý­dan­ǵa barsań da qaınaǵan eń­bek­tiń ústinen túsesiń. Jer jaǵdaıyna qaraı tirshiligin jasap jatyr. Áıtse de so­lar­dyń ishinde shaǵyn kásip­ker­likke erekshe den qoıǵan Saıram aý­da­nynyń jóni bólek. Sondyqtan Muhań­nyń izimen osy maqalaǵa “Saıramǵa bar­sań, dıqanmyn deme” degen taqyryp qoı­dyq. Qula dúzge sý shyǵaryp, jemisin jep, qora-qora mal aıdap qyzyǵyn kórip otyrǵandar qaı aýdanda da jetedi. Al, dıqanshylyqqa materıal izdegen jýrna­lıs­tiń qalamyna Saıram aýdany birinshi bolyp iligip, jazǵany jorǵadaı taıpa­lyp júre beredi. Sebebi, bul aýdanda júzi qaqtaǵan kú­misteı jarqyldaǵan ketpen ustamaıtyn adam joqqa tán. Baý-baqshany kim ósir­meı­di, maldy kim baqpaıdy dersiz, myq­ty bolsańyz tropıkalyq ósimdikter – banan, injir, lımon, qurma ósirip kórdińiz be?! Al, bastaýyn aq bas Alataýdan alatyn Aqsý, Qarasý bulaqtarynyń eteginde otyrǵan Saıram aýdanynyń dıqan­dary ósirip otyr. Saıram aýdandyq aýyl sharýashylyǵy basqarmasynda Shýhrat Qurbanalıev degen azamat bar. Syrt kózge jurt ózbek ju­ra­ǵatyna uqsatqanymen, túbi – qazaq. Sy­ralǵy dos. Keı-keıde aǵyn sýdyń ja­ǵa­syn­da otyryp, “Úkimet nege kómek bermeıdi, tańdaıǵa basar talshyǵymyz joq”, dep óziniń jalqaýlyǵyn áıteýir óltir­meı­tin Úkimettiń qulaǵyna ilip qoıatyn aǵaı­ynnyń saryýaıymyn estigende Saı­ram­ǵa tartyp ketemiz. Ondaıda dıqan al­d­yna kisi bolyp baryp, sáńireıip aspanǵa qarap turatyn bastyqtardy ertýdiń qa­jeti joq, Shýhrat jolbasshy. Sapardan jadyrap qaıtasyń. Jata qalyp jazasyń. Aıqaıǵa oıbaı qosyp júrgen, qıt etse Úkimettiń jonynan taspa tilýge ázir aǵaıynǵa sabaq bolsa, qolyna aı júzdi oraq, kúmisteı jarqyraǵan ketpen ustasa eken dep. JUMYSSYZY JOQ AÝYL Qaıta-qaıta jazsa da jaýyr bolmaı­tyn Qarabulaq aýylynda sońǵy esep boıynsha 41 myń halyq turady delingen. Odan beride eki-úsh myń adam qosylyp qaldy-aý. Aýyl ákimi, keshegi kásipker Al­ymjan Nyshanqulov osy alaqandaı jerdi alyp otyrǵan aýylda “aldyma ju­mys su­­rap eshkim kelmeıdi” degende, tań­dan­ǵa­nym ras edi. Alaqandaı deıtinimiz, aýyl­dyń jer kólemi bar-joǵy 11 myń gektar. Sonyń 7 myń gektarynda aýyl otyr. Shyn­týaıtyna kelseńiz, keıbir ob­lys­tar­dyń eki-úsh aýdanynyń halqyndaı jurty bar osy úlken aýyldyń aýmaǵyn­daı jerdi jeke ózi ıelenip otyrǵan azamattar bar. Bul aýyl kókónis, mal sha­rýa­shylyǵymen jyl on eki aı aınalysady. Sharýashylyq negizi úsh baǵytqa qurylǵan. Aýyldyń sýdan joǵary otyrǵan qyr betkeıi tek mal bordaqylaýmen aınaly­sa­dy. Bir myń ógiz baılap otyrǵany da, qyryq-elýge qanaǵat etip otyrǵany da bar. Bul jaqta bazarǵa túsken mal keri qaıtpaıdy. Qalaı jemdeıtini, semirtetini – bólek taqyryp. Kókónis egetinder de qarap jatpaıdy. Kúzde ósirgen ónimin satqannan keıin sol aqshanyń murtyn buzbastan mal satyp alady. Qańtarǵa deıin bordaqylap, shetinen satady. Aqsha­syna arzan kezinde joǵary sapaly tuqym, tyńaıtqysh alyp qoıa beredi. Kóktemgi egiske bári daıyn. Al osy aýylda 1 myńdaı «KamAZ» taǵy bar. Mindeti qys-kóktem máshınesin saılap, jazdan qońyr kúzge deıin dıqandardyń ónimin syrt jaqqa tasymaldaıdy. Reseı sııaqty elderde áriptesteri bar, kelisim-sharttar jasalǵan. Qarabulaqtan kórshi aýyldar kelin alýǵa qushtar bolǵanymen, qyz berýge kelgende kejegesi keıin tar­typ turar eken. “Bular kelinderine ty­nym bermeıdi, qyzymyzdy zoryq­tyryp baqshalyqtan shyǵarmaıdy”, der eken. Sóıtse de “Qarabulaqtan qyz alsań, bir qap kartoshkasymen keledi”, dep mátel­detetini bar. Nesibeli degenderi ǵoı. Osyndaı jumystary kóp aýylda jumys izdeıtin adam qaıdan bolsyn. Osy aýyl týraly “Egemenge” jazǵan­­­byz. Alymjan sol “Egemen Qazaq­stan­da­ǵy” maqaladan soń Shyǵys Qazaqstan ob­­ly­syndaǵy Ulan aýdanynyń ákimi keldi. 10 shaqty otbasy kóship baratyn bolsa, bar jaǵdaıdy jasaımyz degendi aıt­ty deıdi. Shyǵystyń ákimi Berdibek Saparbaev oń­tústikti bes saýsaǵyndaı biledi. Qarabu­laq­tan kúndiz-túni bir tynbaı jumys ja­saı­tyn on otbasy kóship barsa, tutas aý­yl­dyń ekonomıkasyn kóterip, ózgelerge úlgi bolaryn shotqa salyp eseptep qoıǵan ǵoı. QOZYQUIRYQ PAIDAǴA KENELTÝDE Qoldan ósiretin qozyquıryq – sańy­raý­qulaq degenińiz babyn bilseńiz qyp-qyzyl aqsha. Qazir muny ósirý túk bolmaı qalǵan. Shıtti maqtanyń syǵyn­dy­s­y­nan qalǵan qabyǵy, aǵash úgindisi, ashy­ta­tyn hımııalyq qospa, taǵy birinde qı, taýyq sańǵyryǵy paıdalanylady. Kúı talǵamaıdy. Ýaqtysynda sýaryp otyr­sań bolǵany. Myna bir áńgimeni Sary­aǵashtaǵy “Birtilek” aýylynyń ákimi aıtyp bergen. О́zbekstannan kóship kelgen bir oralman turar eken. Balaly-shaǵaly, aqar-sha­har otbasy, kúıi tómen. Az qamtamasyz etilgen otbasylardyń qataryna jatqy­zyp, kómek bergizip júripti. Bir kúni álgi oralman kelip tur deıdi. Qolynda bir shelek qozyquıryq. “Aǵasy, rahmet. Kómekti jetim-jesirge berersiz. Men tabys kózin taptym”, deıdi. Baryp kóredi. Kádýilgi sıyr qora, kóldeneńinen ilingen syrǵaý­yl­ǵa aǵash úgindisi, shıtti maqta syǵyn­dysy lyqyp toltyrylǵan áıelderdiń qa­ra sanǵa deıin tartyp kıetin shulyqtary ilýli tur. Jan-jaǵyn tesip qoıǵan. O, toba, sol tesikterden qaraqulaq sańy­raý­­qu­laqtar edireıip shyǵyp tur deıdi. Qos qol ýysy tolatyndaı. Sebezgimen sý sha­shady. Adamdardan qýlyq artyla ma?! Ara-tura qytaıdyń balalar oınap ata­tyn otshashýyn qora syrtynan tarsyl­da­typ atar eken. Qoldan jasalǵan naızaǵaı. Erteńinde qozyquıryqtaryńyz qapqa syımaı qalar eken. Adamdar tabıǵattyń týyndysyn óstip te aldaıdy. Osy qozyquıryqtyń kókesi Saıramda ósiriledi. Zapastaǵy ofıser Vasılıı Ba­benkonyń Aqsýkenttegi qozyquıryq jaı­yna arnaıy barǵanbyz. Burynǵy at­shap­tyrym mal qorany yńǵaılastyryp, só­re­ler qoıyp, qozyquıryq ósirip ja­tyr. Qozyquıryqqa keregi – aýa, sý, qys­ta az­daǵan jylylyq. Qalǵanyn Babenko jaq­sy biledi. Shıkizatyn ózi jasaıdy. Bıyl 4 tonna qozyquıryq alǵan. Qazir “MERS” tyńaıtqyshyn paıdalanyp, óni­min kó­beı­tipti. Toǵaıda kezdesetin ýly mýhomor emes, qoıdyń quıryǵyndaı dám­di, boryq­taı appaq. Meıramhanalar qozy­quı­ryq­syz tamaq jasamaıdy. Et jemese, tisi qyshıtyn qazaqtar da úıre­nip jatyr. LIMON, BANAN, INJIR... Saıram aýdanynda Ergash Tillahanov atty baǵban bar. Úıirgelik jerinen-aq paı­daǵa kenelip otyr. Shaǵyn jyly­jaı­ynda lımonnan jylyna 2 ret ónim ala­dy. Barlyq jaǵdaıdy týǵyzatyndyǵy sonshalyq, bir túbiniń ózinen qyrýar jemis jınap alady. Ergesh qarttyń lımon­da­ryna basqa oblystardan suranys bar. Osydan eki-úsh jyl buryn Sary­aǵ­ashta lımon ósiretin tájik qyzy Zýhra muǵalimdi izdep barǵanymyzda, “Bul kóp kútim tilemeıdi, jalqaýlardyń jumysy eken”, dep tańǵaldyryp edi. Bir áttegen-aıy, bizdiń jalqaýlar áli de “alma pis, aýzyma tús” dep alma aǵashynyń kóleń­ke­sinde jatyr. Tórt qabat kórpe saldyryp. Asty syz ǵoı. Ergesh aqsaqal banan, anar, qurma jáne injir ósirýde. Pálendeı ónim almasa da, talap jaqsy. Mundaı qarttar tropıkalyq osy jemisterdi áli-aq jersindiredi... Mankentte de Abaz Hanashev degen azamat banan, lımon ósirip jatyr. 55 MYŃ ShО́JE JÁNE PITONIIа “Jol bolsyn” JShS Aqsýkentte ju­myrt­qadan jylyna 55 myń dana shóje daı­yndaıtyn ınkýbator stansasyn iske qosqan. Bıyl 45 myń shóje basyp shy­ǵar­dy. Satady. Broıler-shóje 120 teńge. Eki aıdan soń 3-4 keli tartatyn dáý taýyq bo­lady. Sondyqtan yqylastana satyp ala­tyndar kóp. Al Aqsý-Abad eldi mekeniniń dıqany Rýstam Abdýrasýlov gúl ósirýge mamandanǵan. 20 sotyq qana jeri bar. Gúl ósirýdiń qyr-syryn ábden meńgerý úshin Qytaıdan bastap birneshe memleketterde bolǵan. Shaǵyn jylyjaıy bar. Qysy-jazy gúl úzilmeıtindikten, basqa oblystardan da tapsyrys túsip jatady. Arzan. Tıimdi. Bala-shaǵasy járdem­de­se­di. 20 sotyq jerimen-aq otbasynyń aý­zy­nan aq maı aǵyzyp otyrǵan kásipti úıreter qazaq kóp bolsa, shirkin... patsha balyǵy jáne ıtalııadan suranys Saıram eldi mekeninde “AKVA-Laıf” seriktestigi jylyna 70 myń tonna forel balyǵyn ósiredi. Taza, aǵyn sýda ósetin, dámdiligi sondaı, aýyzda erıtin patsha balyǵy – foreldi Almatynyń meıram­hanalary attyń qunyn berip, alyp keter eken. Seriktestiktiń bastyǵy Gegıan Polıfaıan degen azamat. Armıannan qazaq qalyp ketpepti. “Qaınarbulaq” aýyldyq okrýgine qarasty Toǵan eldi mekeninde “Nur Batyrhan” JShS tóraǵasy Aıtjan Odamanov degen azamat bulaq sýynan bólgen 13 kólshikte aq amýr, sazan, taban bastaǵan balyqtar ósirip jatyr. “Nur Batyrhan” JShS bir jylda 350 myń dana shabaq satqan. 270 tonna balyq etin daıyndaıdy. Aýyl sharýashylyǵy mı­nıstrliginiń arnaýly grantyn utyp al­ǵan seriktestiktiń jarty shyǵynyn Úki­met sýbsıdııamen ótep berip otyr. Seriktestik basshysy “Aq balyq-aý, aq ba­lyq, qarmaǵymdy qap balyq”, dep otyra beretinder sanatynan emes. 225 gektar jerge tamshylatyp sýarý ádisi boıynsha qyrǵa júzim ekken. Tańdaýly sortty. Sharap ja­saýmen ataǵy álemge máshhúr bolǵan Italııa­­dan mamandar kelip, kótere satyp alamyz dep kelisim-shart jasap ketti. Ita­lııada bolǵanbyz. Memleketti ustap turǵan jekemenshik kásiporyndar, shaǵyn jáne orta kásip. Elde tegis jer az bol­ǵandyqtan, taýǵa qııalap júzimdik ekken ıtalııalyq­tardyń sharabynda qazaq Aıt­jannyń ekken júziminiń shyryny da bolady. MAL BORDAQYLAÝ JÁNE KALIFORNIIа ShÝALShYŃ QURTY Iri qarany bordaqylaý – óte tabysty kásip. Búginde О́skemen qalasynyń ákimi, is­ker azamat degen aýqymnyń ózi taqııa­sy­na tarlyq qylatyn Islam Ábishev Or­da­basy aýdanynda ákim bolyp turǵanda bir jıy­ny­na qatysqanbyz. “Myńdaǵan gektar jer­le­riń bar. Ata-babamyz mal baq­qan, jaıyn bilemiz deısizder de, maldy óriske aıdap salǵannan basqany oıla­maı­syzdar. Sóıtip, baqqan maldaryńyz ar­yq-turaq, beınettenip ekken kóshetterdiń qabyǵyn kemirip júr. Mal bordaqylaýdy bir gektar da artyq jeri joq Qa­ra­bulaqtaǵy ózbek aǵaıyndardan úırenińizder. Ár satqan malynan eki esege paıdaǵa shyǵady”, degen. Islam ákiminiń kór­meı­tini, baıqamaıtyny joq. Onshaqty jyl buryn aıtylǵan sózdiń aqıqatyn búgingi ákimder endi ańdap, kásipkerlerin ata­qaz­sha ertip, Saıramǵa barǵyshtap júr. Mal bordaqylaǵan aǵaıyndy malyna jem bererde baılap ta ustap otyra al­maı­syń. Saǵat túski 1-ge taıanǵanda bar sha­rýasyn tastap, úıine taıady. Qorada baı­laýly maldyń kúndik qoregi úsh mezgil nahan shelek botqa. Kebek, jarma, kún­­jara, shorot, ashytylǵan bıdaı sy­ǵyn­dysy. Biraq, kúndiz-túni jońyshqaǵa baılap qoıǵan maldan semiz, jondy. Sa­ýy­rynan masa taıyp jyǵylady. Qazir Saıram aýdanynda bordaqylaýda 172 myń bas iri qara mal bar. Sonyń 40 myńy biz mysalǵa kóp alǵan Qarabulaq aýylyniki. Bul aýyl daıyndaǵan et bir oblystyń bir jyl et jep, tis shuqýyna erkin jetedi. Qazir aýdanda “Sybaǵa” baǵdarlamasy qyzý júrip jatyr. Bastamashysy – oblys ákimi Asqar Myrzahmetov. Oblys bas­shy­sy “Maksımým” aımaqtyq qarjylandyrý ortalyǵyn sharýalarǵa tıimdi jolmen qaıta qurǵan. Bankterdeı emes, ústemesi tómen, kepildik dúnıe dep qan sormaıdy. Jyldyǵy – 7 paıyz, 3 jylǵa beriledi. “Maksımýmnan” qarjy alǵan aýdandyq “Agronesıe korporasııasy” “Sybaǵa” baǵ­­darlamasy boıynsha “Gúljamal” sharýa­shylyǵynyń basshysy Sábıt О́mirovke 117 bas iri qara, Mankenttegi “Artyq” sharýa qoja­ly­ǵynyń basshysy Ábdisamat Ábýsattarovqa 147 bas iri qara satyp alyp berdi. 7 mıllıon teńgege deıin 6 paıyz ústememen beretin “Aý­yl sharýashylyǵyn qol­daý qory” da elý-otyz bastan mal satyp alýǵa qarjy bólgen. Qarjynyń dıqanǵa túgel tıip, etti, sútti mal alýyna aýdan ákimi Ýálıhan Qaınazarov ta múddeli. Osylaısha, eki jylda 20 myńnan asa iri qara qosylǵan. Qazaqy aq bas sı­yr­dyń ósimin kóbeıtý úshin reprodýk­tor­lyq­ty qolǵa alǵan Sábıt Omarovtyń óz iri qarasy 500-den asady. Adam qalaı qaltaly bolamyn, otbasymdy qysylmaı asyraımyn dep talpynsa, almaıtyn asýy joq qoı. “Áreket túbi – bereket” degen. Saıramda osynsha maldyń qıynan taý turǵyzýǵa bolar edi, biraq kúresinde jatqanyn kórmeısiz. Tereńdigi úsh-tórt metr, arasynda ótetin sańylaýy bar eki úlken ura qazylady da ekeýine de mal qıy toltyrylady. Sosyn birine, ıaǵnı bizdegi juldyzqurtqa uqsaıtyn Kalıfornııa shýalshyńy kóp mólsherde tastalady. Onyńyz aldyna tóre tabaq et tartyl­ǵan­daı azýyn basady. Jegeni boıyna qut, odan shyqqan ónim – gýmýs kádimgi shy­byq qadasań, daraq qylyp ósirgenshe tyn­­baı­tyn qunarly topyraq. Qalta qaǵaz­darǵa salynyp satylady. Almatyda shaǵyn qal­tadaǵysy 400 teńge turady. Bir qap­tan qandaı paıda qalady – esepteı berińiz. Bizdiń aýyl burynǵy Jezqazǵan, qa­zir­gi Qaraǵandy oblysy, Jańaarqa aýda­ny­nyń Sh.Eralıev atyndaǵy keńshary. Negizinen mal sharýashylyǵymen aına­ly­sady. Tórt túlik ustamaıtyn úı joq. Al­ty aı qys qorada turady. Ári qaraı belgili ǵoı. Úı qatarlarynyń arasy jal-jal boqtyq. Aýyl basshylary oıbaıdy salyp júrip traktormen tazartqan bola­dy. Qaıdan, boı bermeı ketedi. Mal qıynan qyp-qyzyl paıda taýyp otyrǵan saıramdyq Nııatbek Jumahanov sekildi aqsaqaldar osyny kórse: “Áı, qazaqtar, altynnyń ústinde júrsińder-aý”, dep jerge bir túkirip keıir me edi. Bálkim, Qaraǵandynyń ákimi Serik Ahmetovke shyǵystyń ákimi Berdibek Saparbaev sekildi saıramdyqtarǵa “úıre­tiń­­dershi, úı ormandaryńmen kóshirip ala­myn”, deý kerek shyǵar... BEREKE BASTAÝY – ALTYN BESIK AÝYLDA Saıramǵa barǵanda aýyldaǵy keı­bi­reý­lerdiń jumys joq deıtinderi beker me eken dep oılaısyń. Izdenseń, kásip bar. Dalada jatqan tegin batpan quıryq joq, sharýa jasaımyn deseń, az paıyzben nesıe beretin “Maksımýmdaı” ortalyqtar bar. Úkimettiń óltirmeıtindigi ras. Shy­ǵar­ǵan qarjyńnyń jartysyn sýbsıdııa esebinde beredi. Shaǵyn jáne orta ká­sipkerlikti órge bastyrýda Saıramda at­qarylyp jat­qan jumystar kóp. Máselen, qaıta óń­deý­di alaıyq. Aýdanda 43 dıirmen, 30 naýbaıhana, 11 kondıterlik seh jumys jasap tur. 20 kókónisti óńdeıtin, 21 maı syǵa­tyn seh bar. Onyń syrtynda sharap óńdeıtin, jún jýatyn, teri óń­deıtin, maqta tútetin, dándi maıdalap quramajem daıyndaıtyn sehtar júzdegen adamdardyń nápaqasyn aıyrýyna qyzmet etedi. Ár­qaı­sysyn jazar bolsańyz, tájirıbesi, tálimi jetedi. Ishinen ekshep aldyq. Áý bastaǵy maqsat óz isin bastap ketýge táýekeli jetpeı júrgen adamdarǵa jol kórsetip, qamshylaý bolatyn. Sol úshin ózge aýdan, qalalardan bir aýdandy bólip aldyq. Parlament depýtaty Bekbolat Tileýhan ózi basshylyq jasap shyǵaryp jatqan “Namys” jýrnalynda kez kelgen adamdardyń qolynan keletin kásipterdiń túrin meılinshe usynyp keledi. Elge bol­syn deıtin azamattyń munysyna súısinip júrmiz. Qalyń quıqaly aýylda turatyn jurttyń kedeı bolatyndaı, masyl­shyl­­­­dyqqa boı uratyndaı eshteńesi joq. Oǵan kómek surap eshkimge alaqan jaımaıtyn, janyna jaqyn kásibin tapqan, óziniń 20 sotyq jerine gúl ósirip, basqa oblys­tar­ǵa da saýdalap otyrǵan saıramdyq Rýstam Abdýrasýlov aqsaqaldyń eńbegi dálel. Osyndaı tirlik moıyndaǵy erinshektik pen boıdaǵy qorqynyshty silkip tastasańyz, sizdiń de qolyńyzdan keledi. Saıram aýdany.

_________

LEBIZDER

Jeńisbek MÁÝLENQULOV, oblystyq ardagerler keńesiniń tóraǵasy: – Bizdiń Otanymyz qysqa merzim ishinde árbir qa­­zaqstandyq maqtan ete alatyn úlken joldan ótti. Elbasymyzdyń álemdik qoǵamdastyqtaǵy be­­­­deli arta tústi. Osynyń bári Qazaqstannyń bú­gin­gi kúsh-qýatyn, áleýetin tanytady. Astanada Oń­tústik Qa­­zaqstan oblysynyń kúnderi ótýin úlken qurmet dep qabyldadyq. Jyldyń tórt mez­­giliniń tabıǵaty bar óńirimiz memleketimizdiń kún­geıinde ornalasqan. Túptep kelgende, respýb­lı­ka­myzdy kókónis, baý-baqsha ónimderimen túgel qam­ta­masyz etetin qýatty oblys. Astanalyq aǵaı­yn­darmen ystyq qaýyshý jalǵasa bersin degimiz keledi. Ulasbek SÁDIBEKOV, “Nur Otan” HDP oblystyq fılıaly tóraǵasynyń birinshi orynbasary: – Búgingi Astana, keshegi Aqmola-Selınograd – jalyndy jastyq shaǵymyz­dyń izi qalǵan qala. Keńes Odaǵynyń óktem saıasaty bel alyp, el, jer ıesi – qazaqqa shekesinen sherýen atyp qarap tur­­ǵanda tórt qubylamyzdy túgendeımiz dep atqa qonǵan ultjandy azamattardyń qatarynda bol­ǵa­nymdy men áli kúnge deıin maqtan etemin. Biz úshin bul aımaq qadirli de qasıetti. Elorda bolýy­men de saltanatty. Zaıyrly Qazaqstan memle­ke­tiniń tamyry osynda órken jaıdy. Álemge áıgili boldy. Ońtústiktiń ystyq sálemin qabyl alýyna shyn júrekten tilektespiz. Baýyrjan SEIITJANOV, “Standart-Sement” JShS dırektory: – Qazaqstannyń bolashaǵy orta jáne shaǵyn ká­sip­kerlikpen qosa serpindi jobalarynda. Iri ın­­dýs­trııa­lyq, ınnovasııalyq kásiporyndardyń kó­beıý­in­de. Meniń ákem, “Standart Sement” zaýy­ty­nyń quryl­taıshysy, belgili mesenat Serikjan Seıitjanov zaýyt qurylysyn qolǵa alǵanda jaı­mashýaq ýaqyt bolatyn. Keıin álemde qarjy daǵ­darysy bastaldy. Myqty memleketterdiń ózi tiz­ginine ıe bola almaı táltirektep qaldy. Zaý­yt­ty konservasııaǵa qoıamyz ba degen oılar bol­ǵan. Biraq, ákem: “Elbasyǵa ýáde bergenmin. Azamat sózin jutpaýy kerek”, dep táýekelge mindi. Ras, úlken nesıe aldyq. Alaıda, elimizde sement­tiń eń sapaly túrlerin daı­yn­daı alatyn zamanaýı zaýyt ýaqyt yrǵaǵymen jumys istep tur. Qazir ózimiz qýanamyz. Al, Astanaǵa kelgende keýdeni maqtanysh kerneıdi. Mundaı jaýhar qala álemde sırek. _______________________________

Materıaldardy daıyndaǵan «Egemen Qazaq­­stan­­nyń» Ońtústik Qazaqstan oblysyndaǵy menshikti tilshisi Baqtııar TAIJAN.