...JAŃA KÁSIPORYN ASTYQ QABYLDAI BASTADY
Bulandy aýdanynyń ortalyǵy Makın qalasynda jańa astyq qabyldaý kásiporny iske qosylyp, sharýashylyqtardan alǵashqy tonna astyqty qabyldaı bastady. Quny 518 mıllıon teńgelik jobany «Arna» jaýapkershiligi shekteýli seriktestigi qysqa merzimde júzege asyrdy. Bul qarjynyń 77,9 mıllıon teńgesi «Arnanyń» jeke qorynan bólinip otyr.
Aqmola oblysynyń ákimi Sergeı Dıachenko egin oraǵynyń sheshýshi shaǵynda paıdalanýǵa berilgen kásiporyn aýdan dıqandarynyń suranysyn tolyq qamtamasyz etýge múmkindik jasaıtynyn atap ótti. Onyń jobalyq qýaty 30 myń astyqty sapaly saqtaýǵa baǵyttalǵan.
Munda 36 adam eńbekpen qamtylǵan.
Baqbergen AMALBEK.
Aqmola oblysy.
* * *
...QYSQA DAIYNDYQ MÁSELESI QARALDY
Oblys qalalary men aýdandarynda qazan aıynyń basynda qazandyqtar iske qosylýy tıis. Osyǵan baılanysty oblys ákiminiń birinshi orynbasary Vıktor Meıster selektorlyq májilis ótkizdi. Onda qalalar men aýdan basshylary baılanysqa shyǵyp, ózderindegi daıyndyq jumystary týraly baıandady.
Májiliste Vıktor Meıster jylý berýdi endi sozbaqtatpaı, qazannyń 1-juldyzynan qosý kerektigin aıtty. Negizinen oblystyń qysqa daıyndyǵy jaman emes. Baılanysqa shyqqan Arqalyq qalasynyń ákimi Temirjan Tóleýbaev jylýdy búgin berýge de daıyn ekenin habardar etti. Biraq mazýt kóktemge deıin tapshy bolýy da múmkin. Sondyqtan oǵan qosymsha qarjy kerek. Rýdnyı qalasy da saqadaı saı. Alaıda kenshiler qalasynyń kógildir otynǵa 3 mıllıon teńge qaryzy bar. Al Lısakov qalasynda qazan aıyn kútpeı-aq qyrkúıektiń 30-ynan bastap jylý berilmek.
Názıra JÁRIMBETOVA.
Qostanaı.
* * *
...BASQARMALARǴA BASShYLAR TAǴAIYNDALDY
Munaıly óńir ákimi Bergeı Rysqalıev oblystyq eki basqarmaǵa jańadan basshylar taǵaıyndaǵan ókimge qol qoıdy. О́ıtkeni, buǵan deıin oblystyq ishki saıasat basqarmasynyń burynǵy bastyǵy statıstıka jónindegi ujymdy basqarýǵa aýysqan edi. Endi ishki saıasat basqarmasyn basqarý úshin ákimniń tańdaýy «Atyraý-aqparat» medıaholdıngine bes jyldaı jetekshilik etken Eldar Jumaǵazıevke tústi.
Al oblystyq bilim basqarmasynyń bastyǵy laýazymyna Satqan Esenǵalıev taǵaıyndaldy. Ol jańa laýazymǵa taǵaıyndalǵanǵa deıingi eki jyldaı oblystyq balalardyń quqyǵyn qorǵaý departamentine jetekshilik etti.
Joldasbek ShО́PEǴUL.
Atyraý oblysy.