Jaqynda Kókpekti aýdanynyń ákimi Dúısenǵazy Mýsın tilshiler qosynyna telefon shalyp, el táýelsizdiginiń 20 jyldyǵy qurmetine qaıyrymdylyq sharalarynyń qyzý ótip jatqanyn habarlady. Ákimniń aıtýynsha, aılyq bastalǵannan beri aýdanda az qamtylǵan turǵyndarmen 40-tan astam kezdesýler ótip, 30-dan astam tegin konsertter berilipti. Turmysy nashar jandarǵa 15 mıllıonǵa jýyq teńgeniń qaıyrymdylyq kómegi kórsetilgen.
El táýelsizdiginiń 20 jyldyǵy qarsańynda barlyq aýyldyq okrýgterde «Mereıli merekege – 20 jarqyn is» aksııalary ótýde. Máselen, Aýhadıev atyndaǵy, Kókjaıyq, Terekti, Kaznakovka aýyldyq okrýgterinde aǵash otyrǵyzý, kóshelerdi kóriktendirý, áleýmettik ǵımarattardy jóndeý jumystary júrgizilgen. Al qaıyrymdylyq sharalary jyl sońyna deıin jalǵasa bermek.
Ońdasyn ELÝBAI.
Shyǵys Qazaqstan oblysy, Kókpekti aýdany.