4 000 000 - Atyraý qalasynan 30 shaqyrym jerde osynsha tonna kúkirt jınalady
Aldaǵy jyldyń sońyna taman Kaspıı teńiziniń qazaqstandyq sektorynan mol munaıdyń alǵashqy tonnalaryn óndirý bastalmaq. Sol kezde teńiz munaıyn Atyraý qalasynan shamamen 30 shaqyrymdaı jerde salynǵan «Bolashaq» zaýytynda túrli qospalardan tazartý qolǵa alynady. Sonyń ishinde munaı quramyndaǵy kúkirt mólsheriniń mol bolatyndyǵy da mamandardy oılandyryp otyr. Máselen, «Adjıp QKO» kompanııasynyń jer ústi keshenindegi jobalary jónindegi menedjeri Lýka Morıdiń jergilikti jýrnalısterge málim etkenindeı, munaı quramynan bólingen kúkirt zaýyt mańynda jınaqtalmaq. Lýka Morıdiń aıtýynsha, jınaqtalatyn kúkirttiń kólemi 4 mıllıon tonnany quramaq. Al sol mol kúkirttiń qorshaǵan ortaǵa áseri qandaı bolmaq? Atyraýda turatyndar densaýlyǵyna zııandy emes pe? Ázirge bul jóninde mamandar eshteńe aıta qoıǵan joq.
Joldasbek ShО́PEǴUL. Atyraý oblysy.
109 000 Jelezın aýdanynyń sharýashylyqtary bıyl osynshama gektar alqapqa aýyl sharýashylyǵy daqyldaryn ekti
Aýdandyq aýyl sharýashylyǵy bóliminiń habaryna qaraǵanda, bıyl 110 sharýashylyq, sonyń ishinde 14 seriktestik, 96 sharýa qojalyǵy egin salypty. Iаǵnı, bıdaı 87,9 myń ga, arpa 9,1 myń ga, suly 8,5 myń ga, qaraqumyq 2,3 myń ga, kúzdik qara bıdaı 0,63 myń ga, burshaq 0,3 myń ga kóleminde bolǵan. Al Aqsýdaǵy Jolqudyq elevatoryna 15,1 myń tonna bıdaı men 793,78 tonna arpa tapsyryldy. Sońǵy jyldary alǵashqy ret «Samuryq» seriktestigi 60 ga, «Pahar» seriktestigi 8,2 ga alqapty sýarmaly jerge aınaldyrdy. Sonymen qatar, aýdan kóleminde kúnbaǵys, qaraqumyq, kartoptan jyl saıyn mol ónim jınalady. Jalpy quny 477,1 mıllıon teńgege 34 jańa tehnıka satyp alyndy. Bul kúnderi aýdan kóleminde 32 qaıta óńdeý nysandary ashylyp, jumys jasaýda. Olardyń qatarynda 4 dıirmen, 13 naýbaıhana, 1 sút óńdeý sehy, 2 shujyq sehy, makaron, jarma, teri sehtaryn ataýǵa bolady.
Farıda BYQAI. Pavlodar oblysy.
100 Qaraǵandydaǵy «Sılısıým Qazaqstan» JShS zaýyty shyǵaratyn kremnııdiń osynsha paıyzy eksportqa jóneltiledi
Elimizde birinshi ret metaldyq kremnıı óndirýdi bastaǵan bul kásiporyn osy ýaqytqa deıin onyń 8 myń tonnasyn aldy. Joǵary tehnologııalyq qondyrǵylar jasaýda qoldanylatyn mundaı ónim túri álemde áli de sırek. Soǵan baılanysty óte ótimdi. Sondyqtan Qaraǵandy kremnııiniń barlyǵy, ıaǵnı 100 paıyzy syrtqy rynokta úlken suranysqa ıe taýarǵa aınaldy. Onyń sapalyq kórsetkishi 99,4-99,6 paıyzdy quraıdy. Jaqynda zaýyttyń ekinshi kezeginiń qurylysyn salý týraly sheshim qabyldandy.
Aıqyn NESIPBAI. Qaraǵandy.