Keshegi qolyna naıza ustap, el men jerdi qorǵaǵan batyrlardyń jalǵasy – qazirgi polısııa qyzmetkerleri desek qate aıtpaımyz. Olar táýelsiz eldiń tynyshtyǵy men beıbitshiligin kúzetýde kúni-túni kirpik qaqpaı qyzmet etip keledi.
Qapelimde qastyq qylǵandarǵa qarsy turam dep janyn qıǵandary qanshama?! Mundaı batyl qadamǵa sheshýshi sátte halyq múddesin bárinen joǵary qoıatyn naǵyz eljandy, otansúıgish azamattar ǵana bara alatyndyǵyna kózimiz jetti. Al qara basynan halqynyń qamyn oılaǵan bul azamattar qandaı qurmetke bolsa da laıyq!
Jambyl oblysy ishki ister departamenti basshylyǵynyń bastamasymen qyzmettik boryshyn atqarý barysynda qaza bolǵan qyzmetkerlerdi keıingi urpaqqa dáripteý maqsatynda «12 qarasha - eske alý kúni» retinde atap ótý dástúrge aınalyp otyr.
Qyzmet jolynda janyn qıǵan polıseılerdiń otbasylary men ishki ister organdarynda birneshe jyl qyzmet jasap, qurmetti zeınetkerlikke shyqqan ardagerlerdiń tynys tirshilikteri Taraz qalasy ishki ister basqarmasy basshylarynyń da udaıy nazarynda.
Sonyń bir dáleli retinde bıyl da «Mılısııa qyzmetiniń qurylǵanyna 100 jyl» tolýyna oraı ıgi is óz jalǵasyn tapty. Taraz qalasy ishki ister basqarmasynyń basshysy polısııa polkovnıgi Erlan Myrzahanuly bastaǵan jeke quram 2011 jylǵy 12 qarashadaǵy lańkestik oqıǵada qandyqol terrorshynyń qolynan qaza bolǵan oblystyq mamandandyrylǵan kúzet qyzmeti basqarmasy memlekettik mekemesiniń jedel den qoıý vzvodynyń qyzmetkeri, polısııa aǵa serjanty Polat Aıanqulov pen qarýly kúdiktilerdi quryqtaý barysynda oqqa ushqan Taraz qalasy ishki ister basqarmasy 1 polısııa bóliminiń ýchaskelik polısııa ınspektory, polısııa kapıtany Jandos Bekdaıyrovtyń otbasylaryna baryp, jaǵdaıymen tanysty. Eli úshin týǵan erlerdi tárbıelep ósirgen ata-analaryna, otbasylaryna alǵysyn bildirip, baǵaly syılyqtaryn tapsyrdy.
Sondaı-aq ishki ister organynyń ardageri Tynyshtyq Ilıasovtyń otbasyna baryp, qarııanyń maǵynaly áńgimelerin tyńdap, ishki ister basqarmasynyń arnaıy daıyndaǵan quttyqtaý qaǵazy men syılyǵyn tapsyrdy.
Beıbit turǵyndardyń ómirin qandyqol lańkesterdiń qaýip-qaterinen saqtaý jolynda mert bolǵan quqyq qorǵaý organdary qyzmetkerlerine qurmet eshqashan tolastamaıdy. Qaıta jyldar ótken saıyn jańǵyryp, jas urpaqqa otanshyldyq rýhynyń belgisindeı jarqyraı beretini haq.