Bizdiń eltańbamyz 1992 jyly resmı túrde bekitildi. Ol kezde gerb jobalaryn talqylaýǵa arnalǵan memlekettik komıssııa jumys istegen edi. Onyń tóraǵasy jaqynda ǵana aramyzdan ketken akademık Salyq Zımanov bolatyn. Osy komıssııa meniń jasaǵan eltańbanyń nusqasyn 1992 jylǵy 4 maýsym kúni Joǵarǵy Keńestiń HII sessııasynda depýtattardyń qaraýyna jiberdi. Shyny kerek, eltańbany jasaý úshin kóp ýaqyt ketti. Bir aıdaı ýaqyt ketken shyǵar. Ony jasaý úshin elimizdiń tarıhyn, dástúrin zerttedim. Bizdiń mádenıetimizdiń ózi tereń ǵoı. Saq dáýirinen keıin kıiz úıdiń tarıhynyń ózi úsh myń jylǵa ketedi. Eltańbany jasaý úshin tarıhty jan-jaqty zerttep, kóshpeli halqymyzdyń mádenıeti men elimizdiń qazirgi óz táýelsizdigin alyp, qaıta otaý tikkenge deıingi aralyqta qamtýǵa tyrystym. Eltańbaǵa shańyraq, kerege, bosaǵa, tulparlar sııaqty halqymyzdyń basqa da qasıetti dúnıelerin ornalastyrýdy jón kórdim. Sóıtip, eltańbany jasap bolǵan soń, ony Shymkentten júk kóligine tıep Almatyǵa ákeldim. Dıametri 2 metr bolyp shyqty. Sessııada jobany talqylanǵannan keıin ol ilinip qoıylatyn boldy. Biraq sessııa kezinde biraz tartys bolyp, depýtattar juldyzǵa, qoshqar múıizge qarsy shyǵyp, bul juldyz Keńes Odaǵynyń belgisi emes pe degen ýájderin aıtty. Sonda Elbasynyń tereń oılaıtyny ǵoı, Nursultan Ábishuly: «Juldyz – KSRO-nyń belgisi emes, onyń dinge eshqandaı qatysy joq. Ár adamnyń, ár eldiń óziniń juldyzy bolady. Bizdiń jas memleketimizdiń juldyzy jarqyrap júrsin», degen tilegin aıtyp depýtattardy Eltańbany qabyldaýǵa shaqyrdy.
Jalpy, konkýrsqa resmı túrde 245 jumys usynylǵan bolatyn. Sonyń ishinde qazirgi Eltańbamyz qabyldandy. Gerb jaqsy shyqty dep oılaımyn. Barlyq jerde jyly sózder estip jatamyn. Al shet elde bizdiń Týymyz ben Eltańbamyzǵa jurtshylyqtyń súısine qaraıtynyn únemi baıqap júremin.
Jandarbek MÁLIBEKULY, sáýletshi.