Qaıyrymdy júrek qartaımaıdy

Elbasy bıylǵy Joldaýynda eldiń ahýalyn jaqsartý úshin jańa áleý­met­tik saıasattyń asa qajettigin atap kór­setip, Úkimetke halyqty eńbekpen qam­tý jóninde jańa baǵdarlama qabyl­daýdy tapsyrǵany belgili. Jambyl júıke aýrýlary ınternat úıi qaladan 40 shaqyrym jerdegi tabı­ǵaty sulý taýly aımaqtyń etegine or­nalasqan. Taıaq tastam jerde Teris-Ashy­bulaq toǵanynyń aıdyny jar­qy­rap kórinip jatyr. Búginde 3 qabattan turatyn ǵımaratta ákimshilik, dáriger­lik bólimder, dárishanalar, ashana jáne ınternat turǵyndarynyń kópte­gen bólmeleri ornalasqan. Ol bólme­lerde kútimge zárý jasy 18-den asqan 340 adam memlekettiń qamqorlyǵyna alynǵan. Olarǵa áleýmettik jaǵdaı jasaý úshin qajetti nárselerdiń bári qarastyrylǵan. Shomylamyn, kir jýa­myn, shashymdy qıdyramyn, kıimimdi tigemin nemese densaýlyǵymdy teksertemin deı qalsa, ınternatta ne qajet­tiń bári saqadaı-saı daıyn. О́tken jyldan bastap ınternat úıin­degi memleket qamqorlyǵyndaǵy aza­mattarǵa jańa standart boıynsha áleýmettik sala mamandary kómek kór­sete bastady. Soǵan saı jańa shtat qurylyp, mamandar alyndy. Búginde psıholog, defektolog, muǵalim, mýzyka men áleýmettik qyzmet kórsetý ma­man­dary, eńbek terapııasy nus­qaýshylary, dene shynyqtyrý jáne mádenı uıym­dastyrýshylar memleket qamqorly­ǵyn­daǵy azamattardyń kóńil-kúıin jasqartý maqsatynda kúndiz-túni eńbek etýde. Qazir ınternatta halyqty áleý­mettik qorǵaý salasy boıynsha arnaýly áleýmettik qyzmetterdi kórsetý stan­dartynyń 8 baǵyty boıynsha jumys­tar jasalýda. Olar: birinshi, áleýmet­tik-turmystyq qyzmet, ıaǵnı qyzmet alýshylardyń kúndelikti ómirde tirshilik áreketine kómektesýge baǵyttalǵan; ekinshi, áleýmettik-medısınalyq qyz­met, ıaǵnı qyzmet alýshylardyń den­saýlyǵyn jaqsartý jáne qoldaý áre­ketine baǵyttalǵan; úshinshi, áleýmet­tik-psıhologııalyq qyzmet, ıaǵnı qyz­met alýshylardyń qorshaǵan ortaǵa áleýmettik beıimdelýi, psıhologııalyq jaǵdaıyn túzetýge baǵyttalǵan; tór­tin­shi, áleýmettik-pedagogıkalyq qyz­met­teri, ıaǵnı 18 jastan asqan aza­mattardy turmystyq daǵdyǵa úıretý, pedagogıkalyq korreksııa men oqytýǵa baǵyttalǵan; besinshi, áleýmettik-eńbek qyzmeti, ıaǵnı qyzmet alýshylardyń eńbek qabiletin qalyptastyrý, 18 jastan asqan azamattar, múgedekter men qarttardy eńbekke baýlý men olarǵa jaǵdaı jasaý; altynshy, áleýmettik-mádenı qyzmetteri, ıaǵnı áleýmettik-mádenı sharalardy uıymdastyrý jáne oǵan qyzmet alýshylardy tartý; jetinshi, áleýmettik-ekonomıkalyq qyzmet, ıaǵnı qyzmet alýshylardyń turmys jaǵ­daıyn jaqsartýǵa baǵyttalǵan jáne segizinshi, áleýmettik-quqyqtyq qyzmet, ıaǵnı qyzmet alýshylardyń quqyqtyq statýsyn demeýge nemese ózgertýge baǵyttalǵan, zańgerlik kómek kórsetý, quqyqtaryn zańdy túrde qorǵaý. Bıyl shilde aıynda ınternatqa Eńbek jáne halyqty áleýmettik qorǵaý mınıstri G.Ábdihalyqova kelip, osyn­daǵy uıymdastyrý jumystaryna rızalyq bildirip, jaqsy baǵa berdi. Qaıyrymdy júrek qartaımaıdy. Internat qyzmetkerleri jarymjan adamdarǵa táýlik boıy tik turyp qyzmet etip, qajetti em-domdaryn jasap, ýaqtyly tamaqtandyryp, júıkesi sharshaǵan jandardyń kóńilin taýyp, qaıta ómir súrýge qushtarlyǵyn oıatýǵa qoldarynan kelgenniń bárin jasap jatyr. Myna almaǵaıyp zamanda adamǵa eń keregi qaıyrymdylyq pen meıirim, shapaǵat. Bul jumysty mekeme bas­shy­sy Balabek Narbaev sııaqty úlken júrekti azamattar ǵana jaýapkershilikpen atqara alsa kerek dep bilemiz. Kósemáli SÁTTIBAIULY. Jambyl oblysy, Jambyl aýdany, Qyzyltań aýyly.