Jańaózendegi oqıǵaǵa quqyqtyq baǵa berilýde

Keshe Bas prokýratýranyń resmı ókili N.Súıindikov Jańaózenge baılanysty sońǵy jaǵdaıdy aıtyp berdi. Ol 16 jeltoqsanda oryn alǵan jappaı tártipsizdikterge baılanysty qozǵalǵan qylmystyq isterdiń nátıjesinde 20 adam ustaldy, olardyń 18-i sottyń sanksııasymen qamaýǵa alyndy, dedi. Jańaózen qalasyndaǵy tár­tip­sizdikter nátıjesinde 16 adam qaıtys boldy. Degenmen, resmı ókildiń aıtýynsha, olardyń keı­bireýleriniń ólimi quqyqtyq tár­tipti qorǵaý organdarynyń áre­ket­terimen baılanysty emes kó­ri­nedi. Máselen, qaıtys bolǵan lıseı oqytýshysy Atabergen Dúı­sekenovtiń ákesi óziniń ulyn tárbıelenýshilerin merekelik sha­ra­larǵa alyp shyqqany úshin buzaqylar óltirgenin habarlaǵan. Al máıiti «Sýlpak» dúkeninde ta­bylǵan Nurlan Munalbaevtyń óliminiń sebebi joǵary tempera­týra­nyń áseri eken. Sol sııaqty Atabaı Qulqaı­rov­ty óltirý qylmysy ashylǵan. Bul qylmysty jasaǵan degen kúdikpen Jańaózen qalasynyń bir turǵyny qamaýǵa alyndy. Kýá­lerdiń aıǵaqtary boıynsha dál osy adam 2011 jyldyń 17 jeltoqsanynda Jańaózen qa­lasynyń 5-shi móltek aýdanynda Qulqaırovqa oq atqan. Osylaısha, tergeýmen adam­dar­dyń qaza bolýynyń árbir fak­tisi boıynsha, onyń ishinde qyl­mys­t­yń jolyn kesýde qa­jet­ti sha­ralardyń sheginen shyǵyp tabeldik qarý qoldanǵan polısııa qyzmetkerleri áreketteriniń zań­syz­dyǵy týraly habarlar boı­ynsha da derekter anyqtalýda jáne quqyqtyq baǵa berilýde deıdi. Bul oraıda Bas prokýratýra 2011 jyldyń 27 jeltoq­sa­nynda polısııa qyzmetkerleriniń qarýdy adamdarǵa qaraı atý ná­tıjesinde ólimge soqtyrý deregi boıynsha Qylmystyq Kodekstiń 308-baby 4-bóliginiń «b» tarma­ǵy­men  qyl­mys­tyq is qozǵaǵan. Shynaıy­lyq­ty qamtamasyz etý maqsatynda bul is arnaıy pro­kýrordyń bas­shy­lyǵyndaǵy toppen tergelýde. Qazirgi ýaqytta is boıynsha bir­qatar qajetti sot saraptamalary taǵaıyn­daldy. Onyń jumysyna Mańǵystaý ob­lysy ardagerler ke­ńesiniń tór­aǵasy О́mirzaq Ozǵan­baev­tyń bas­qa­rýymen qoǵamdyq komıssııa tar­tyldy. Komıssııa múshe­le­ri­niń qa­la­lyq múrdehanaǵa, ýa­qyt­­sha ustaý abaqtysyna barýy jáne qyl­mys­tyq is boıynsha us­talǵan tulǵa­lar­men kezdesýi qamtamasyz etildi. Qala turǵyndaryn zańsyz us­taý­ǵa jáne olarǵa tyıym salyn­ǵan tergeý ádisterin (qınaý) qol­danýǵa qatysty shaǵymdardy qa­raý maq­satynda bólek komıssııa quryldy. Onyń quramyna prokýratýra jáne basqa quqyq qorǵaý organdary qyz­metkerlerimen qa­tar eńbek ardagerleri, qalanyń aqsaqaldary, úki­met­tik emes uı­ym­dardyń músheleri, sondaı-aq jappaı tártipsizdik kezinde jáne odan keıin ustalǵan adamdardyń týystary endi. Komıssııa múshelerine qamaýǵa alynǵandardyń jáne ákimshilik tártippen ustalǵandardyń tizimderi usynyldy, olarmen ýaqyt­sha ustaý abaqtysyna, ákimshilik qamaýǵa alynǵandarǵa arnalǵan qabyldaǵyshqa barý júzege asy­ryldy. Sóıtip, komıssııa múshe­le­ri ustalǵandarmen áńgimelesti, olardy ustaý jaǵdaıyn jeke óz­deri kórip, densaýlyqtary durys ekendigine kóz jetkizdi. Sondaı-aq, komıssııa músheleri qalalyq IIB-nyń sharýashylyq aýlasyn, ga­rajdaryn jáne qalalyq aýrý­ha­nanyń jertólesi men múrde­ha­na­syn qarap shyqty. Bul shara komıssııa múshelerine adamdardy zańsyz ustaý, olardy qorlaý jáne óltirý týraly qaýesetterdiń negizsizdigine kóz jetkizýleri úshin qajet boldy.

Osyndaı qaýesetterdiń negizdigin anyqtaýda quqyq qorǵaý or­gandary Jańaózen qalasyndaǵy oqıǵalarǵa qatysty resmı  qýat­tal­maǵan aqparattardy da tekserýde eken. Máselen, keıbir buqa­ra­lyq aqparat quraldary arqyly óziniń kelini Sholpan Jańaózen qalasyndaǵy jappaı tártipsiz­dik­ter kezinde mert bolǵan 23 adam­nyń kózderin japqanyn aıt­qan A.Ýngarovadan jaýap alyn­dy, deıdi resmı ókil. Osy oraıda suralǵan Sholpan О́tekeeva Ýn­ga­rovanyń sózderin joqqa shyǵar­dy jáne ólgenderdiń kózderin jap­paǵanyn, ózi tikeleı 2011 jylǵy 16 jeltoqsanda qaza bol­ǵan tek 3 adamdy kórgenin habar­lady. Sonymen qatar, ol Ýnga­rovaǵa kelin emes kórinedi. Son­dyqtan da qazirgi ýaqytta A.Ýn­garovany buqaralyq aqparat qu­raldaryna kórineý jalǵan máli­metter bergeni úshin ákimshilik jaýapkershilikke tartý máselesi qaralýda, dedi N.Súıindikov.

Aleksandr TASBOLATOV.