Chehııalyq novinky.cz saıtynyń habarlaýynsha, osy eldiń Kólik mınıstrligi quny 16 mln eýro turatyn saıtty jekemenshik kompanııaǵa jasatpaqshy bolyp, kelisimshartqa otyrǵan. Aqsha shashqysh mınıstrdiń bul qylyǵy birqatar programmıske unamaǵandyqtan olar dál osy saıtty tegin jasap shyǵýǵa bel býady.
Memlekettik tapsyrys boıynsha mınıstrlik oryndaýshyǵa bir ınternet-dúken jáne iOS jáne Android operasııalyq júıelerine arnalǵan 2 qoldanba jasatpaqshy bolǵan. Konkýrs ashyq túrde júrgizilmegeni óz aldyna, Asseco Central Europe kompanııasymen 4 jylǵa jáne 15 mln 870 myń eýroǵa kelisim jasalǵan. Mundaı sharyqtaǵan baǵaǵa jasalǵan kelisimshart týraly estigen bir top programmıst narazylyq bildirip qana qoımaı, dál osy saıtty ózderi jasaýǵa kirisken.
Jergilikti Actum Digital kompanııasynyń basshysy Tomash Vondrachek memlekettik organnyń sheshimin ysyrapshylyq dep baǵalap, cheh programmısterin birige otyryp dál osyndaı saıt jasaýǵa shaqyrǵan. Nátıjesinde #Znamkamarada hakatonyna eldiń 300 mamany qatysamyz dep nıet bildirgen. Onyń 60-y 24 qańtar kúni jumysqa kirisip, 26-synda mınıstrliktiń talaptaryna ábden sáıkes keletin fairznamka.cz saıtynyń platformasyn quryp úlgergen. Hakatonnyń dúrmegi, tipti, el Premer-Mınıstri Andreı Babıshke de jetip, onyń ózi osy sharaǵa kelip, «Mynany estigen talaı atqaminerdiń tamaǵynan as ótpeı qalǵan shyǵar» dep súısinip, mamandarǵa qoldaý kórsetken.
27 qańtar kúni saıt testtik rejimde jumysyn bastap, memlekettik júıege qosylmasa da, tapsyrystaǵy barlyq qyzmetterdi kórsete alatyn shama-sharqyn kórsetken. Alǵashqy bir táýlikte fairznamka.cz saıtyna 175 myń adam kirip, onyń aqyly qyzmetterin satyp alǵan. Túsken qarjyny qaıyrymdylyqqa jumsaý týraly aıtyldy.
Úkimet alǵashynda saıt jasaǵandardyń qyzmetin tólemekshi bolǵanmen, artynsha ony syılyq retinde qabyl aldy. El bıligi bul saıtty ary qaraı qoldap, qyzmet kórsetý úshin ashyq konkýrs jarııalaıtyndyqtaryn málimdedi. Tomash Vondrachektiń kompanııasy bul konkýrsqa qatyspaımyz dep sheshti. Saıttyń ary qaraı jumys isteýine qajetti qarjy aldyndaǵy somanyń tek 25 paıyzyn ǵana quraıtyn boldy. Endi el bıýdjetine qanshama qarjy únemdelgenin esepteı berińiz.
Osylaısha, ózderin patrıot sanaıtyn qarapaıym ǵana adamdar bıýdjet qarjysyn únemdep qana qoımaı, keremet úlgi bolatyn is kórsetti. Memlekettik qyzmetkerler úshin de bul úlken keremet silkinis boldy. Chehııanyń Kólik mınıstri Vladımır Kremlık masqara bolyp, jumysynan qýyldy.