Senat depýtaty Rysqalı Ábdikerovtiń Qaraǵandy oblysyna sapary Nura aýdanymen jalǵasty, - dep habarlaıdy Egemen.kz.
Jergilikti atqarýshy organdardyń ókilderi senatorǵa óńirde kásipkerlik salasy qarqyndy damyp kele jatqanyn aıtty. О́z kásibin ashqan turǵyndar «Aýyl – el besigi» jáne «Jumyspen qamtýdyń jol kartasy» memlekettik baǵdarlamalarynyń ıgiligin kórip otyr.
Atalǵan jol kartasy aıasynda aýdan boıynsha jıyrmaǵa jýyq joba qolǵa alynǵan. Olardyń jalpy quny bir jarym mıllıard teńgeni quraıdy. Sonyń ishinde 15 joba ınfraqurylym salasyna tıesili bolsa, qalǵany ınvestısııalyq bastamalar. Qazirgi tańda aýdanda mektep qurylysy jáne jol jóndeý jumystary júrgizilýde. Sondaı-aq kóshelerge jaryq shamdary ornatylyp jatyr.
Sapar barysynda Senat depýtaty koronavırýs indetine qatysty aımaqtaǵy ahýalǵa erekshe kóńil bólip, Ortalyq aýdandyq aýrýhanaǵa arnaıy bardy. Jergilikti mamandardyń aıtýynsha, pandemııa bastalǵaly beri aýdannyń 1700-ge jýyq azamatynan synama alynǵan. Sonyń 246-synan dert juqtyrǵany anyqtalǵan. Degenmen, búginde naýqastardyń 90 paıyzy emdelip shyqqan.
О́z kezeginde senator emdeýmen birge, aýrýdy anyqtaý, aldyn alý sharalaryn únemi basty nazarda ustaý kerektigin aıtty. Osy rette Memleket basshysynyń tapsyrmasymen naýqastardyń úılerine baryp medısınalyq qyzmet kórsetetin eki birdeı mobıldi brıgada qurylǵanyn aıta ketken jón.
Sonymen qatar senator aýdandyq prokýratýranyń qyzmetkerlerimen kezdesti. Sonyń barysynda Rysqalı Ábdikerov azamattardyń turmys sapasyn arttyrý úshin Úkimettiń arnaıy baǵdarlamany qolǵa alǵanyn jáne Parlament osy maqsatpen birqatar zań qabyldaǵanyn jetkizdi. Depýtat Parlamenttiń Qylmystyq kodekske túzetýler engizgenin de tilge tıek etip, mundaı sharalar aýyldyq jerlerde qylmysty azaıtyp, halyqtyń ál-aýqatyn arttyrýǵa yqpal etetinin atap ótti.