Premer-Mınıstrdiń orynbasary Roman Sklıar Atyraý oblysyna bardy, onda balyq salasyn damytý boıynsha iri ınfraqurylymdyq jobalar men memlekettik baǵdarlamalardyń iske asyrylý barysyn tekserdi, dep habarlaıdy Egemen.kz Premer-Mınıstrdiń baspasóz qyzmetine silteme jasap.
Roman Sklıar men Atyraý oblysynyń ákimi "Aqtóbe-Atyraý-RF shekarasy" avtomobıl jolyn qaıta jańartý ýchaskelerine baryp, jaýapty memlekettik organdardyń basshylarynyń qatysýymen shuǵyl keńes ótkizdi. Merdiger uıymdar turaqty jumyspen qamtamasyz etý jónindegi sharalar, aldaǵy kezeńge arnalǵan josparlary týraly baıandady.
Joldyń jalpy uzaqtyǵy 893 shaqyrymdy quraıdy, onyń ishinde Atyraý oblysynyń aýmaǵy arqyly 545 shaqyrym jol ótedi. Premer-Mınıstrdiń orynbasary qurylys jumystaryn ýaqytyly ári sapaly aıaqtaý mindetin qoıdy. Oblysqa sapary barysynda R. Sklıar turǵyn úı qurylysynyń barysymen tanysty. Turǵyn úıdiń qoljetimdiligin jaqsartý maqsatynda aǵymdaǵy jyly munda 800 myń sharshy metr turǵyn úıdi paıdalanýǵa berý josparlanýda.
Halyqty turǵyn úımen qamtamasyz etý "7-20-25", "5-10-20" memlekettik baǵdarlamalary arqyly iske asyrylady. Sondaı-aq R. Sklıar men ekologııa, geologııa jáne tabıǵı resýrstar mınıstri M. Myrzaǵalıev balyq sharýashylyǵy kásiporyndaryna bardy. Mysaly, Jaıyq-Atyraý bekire balyq ósirý zaýytynda Úkimet delegasııasy bekire balyqtaryn saqtaý jáne balyq ósirýdi qalpyna keltirý boıynsha jumystarmen tanysty. Munda jyl saıyn Jaıyq ózenine bekire tuqymdas balyqtardyń 3,5 mln shabaǵy shyǵarylady. Delegasııa "Amangeldi" atyndaǵy JShS sehynda boldy, onda táýligine 395 tonna balyq qaıta óńdeledi jáne "Saѕrian Royal Fish" JShS bekire balyq ósirý zaýytyna bardy, onyń jobalyq qýaty jylyna 100 tonna taýarlyq balyq óndirisin quraıtyn bolady. Úkimet delegasııasy tez salynatyn qurylys tehnologııasy boıynsha modýldik bloktardan turǵyzylatyn 200 tósek-orynǵa arnalǵan jańa juqpaly aýrýlar aýrýhanasynyń qurylysyn tekserdi.
Ǵımaratty naýqastardy dıagnostıkalaý, emdeý, medısınalyq qyzmetkerler men pasıentterdiń qaýipsizdigin qamtamasyz etý úshin zamanaýı jabdyqtarmen jaraqtandyrý josparlanýda. Sapar qorytyndysy boıynsha Roman Sklıar qurylys jumystarynyń qarqynyn kúsheıtýdi tapsyrdy jáne halyq úshin iske asyrylyp jatqan ınfraqurylymdyq jobalardyń sapasyn qamtamasyz etýdiń mańyzdylyǵyn atap ótti.