Qazaqstandyq aralas jekpe-jek sheberi Qýat Hamıtov Reseıde ótken Fight Nights Global 98 týrnırinde jarys qojaıynymen baq synap, alǵashqy raýndta aıqyn basymdyqpen jeńiske jetti.
Máskeý tórinde uıymdastyrylǵan aıqasta jerlesimiz áý basta reseılik Oleg Kosınovpen (7-5) kim myqtyny anyqtaý kerek bolatyn. Alaıda jarysqa bir kún qalǵanda Hamıtovtyń qarsylasy ózgerip, Kosınovtyń ornyna taǵy bir reseılik sportshy Ahmad-Han Bokov shyǵatyny belgili boldy. 74 kılo salmaq dárejesinde ótken básekede «Naıman» laqap atymen tanylǵan otandasymyz Bokovty birinshi raýndtyń orta tusynda qylqyndyrý ádisimen jeńip ketti.
Jekpe-jekten keıin sóz alǵan Hamıtov bul jeńisin jýyrda ǵana ómirden ótken, jekeleı sportta qazaqtan shyqqan alǵashqy Olımpıada chempıony Jaqsylyq Úshkempirovke arnaıtynyn málimdedi.
Aıta keteıik, Qýat Hamıtov 2016 jyldan keıin aralas jekpe-jek sportynda birinshi ret jeńis toıyn toılady. Bul ýaqyt aralyǵynda úsh aıqas ótkizgen ol úsheýinde de qarsylasyna jol bergen edi.