Qostanaı oblysynyń Arqalyq qalasyndaǵy qala quraýshy kásiporyn, qýaty jylyna 120 mln dana jumyrtqa shyǵaratyn jáne 220 turaqty jumys orny bar "Agroınterptısa" JShS qus fabrıkasy belgisiz merzimge jumysyn toqtatady, dep habarlaıdy Egemen.kz atalǵan fabrıkanyń baspasóz qyzmetine silteme jasap.
Qazaqstanda joǵary patogendi qus tumaýynyń taralýyna baılanysty kásiporynda qustar jappaı qyryldy. Qus fabrıkasynda indet bastalǵanǵa deıin qus basynyń jalpy mólsheri 502 600 basty quraǵan.
Qoldanystaǵy normalarǵa sáıkes, qus aýrýy kezinde alyp tastaý jáne joıý máseleleri Qazaqstan Respýblıkasy Aýyl sharýashylyǵy mınıstrliginiń Veterınarııalyq baqylaý jáne qadaǵalaý komıtetimen, Aýyl sharýashylyǵy mınıstrliginiń respýblıkalyq epızootııaǵa qarsy bólimimen qaralady – olar negizgi ýákiletti organdar bolyp tabylady. Biraq búgingi kúnge deıin atalǵan memlekettik organdar joıý prosesin sozyp, áreket etpeı otyr.
"Biz birde-bir alyp tastaý aktisin de, joıý aktisin de alǵan joqpyz, biz alyp tastaý týraly birde-bir qaýly alǵan joqpyz, bizdiń fabrıkada ashyq aýada áli de 70 myń basqa jýyq qustar jatyr. Biz jaı ǵana qustardy joıýǵa bar kúshimizben kómektesip jatyrmyz, biraq memlekettik organdarsyz joıýdy óz betinshe júrgizýge quqyǵymyz joq. О́kinishke qaraı, memlekettik organdardan qoldanystaǵy Erejeler sheńberinde ýaqytyly áreket etýin, tıisti resimdeýin, ótemaqy men kómek tóleýin kútýdiń qajeti joq ekendigi túsinikti bolyp otyr, sondyqtan biz fabrıkanyń jumysyn tolyǵymen toqtata turýǵa jáne qyzmetkerlerdi qysqartýǵa májbúrmiz. Búgingi tańda biz qyzmetkerlerge qyrkúıek aıyna tolyq jalaqy tóledik, kredıtorlarmen esep aıyrysýǵa, kommýnaldyq tólemder men salyqtardy tóleýge nıettimiz. О́lim-jitimnen týyndaǵan tikeleı zalal somasy 554,7 mln teńgeni, alynbaı qalǵan jumyrtqadan utylǵan paıda somasy 356,0 mln teńgeni, bank pen jetkizýshiler aldyndaǵy boryshtar 500 mln teńgeden astam somany qurady", - dedi kásiporynnyń quryltaıshysy jáne ınvestory Aleksandr Lorens.
Kásiporynnyń qyzmetin qaıta bastaýǵa keminde bir jyl qajet bolady. Bul úshin qajetti salymdardyń mólsheri shamamen 1,5 mıllıard teńgeni quraıdy. Investor úshin negizgi máseleler - óndiristi qaıta bastaý úshin mundaı aqshany qaıdan alýǵa bolady jáne AShM-niń jumyrtqa qus fabrıkalaryna qatysty ózgergen saıasatyn eskere otyryp, muny isteý turarlyq pa.
Arqalyqtaǵy qus fabrıkasy 1970 jyldan beri jumys istep kelgen. Qyzmeti 1992 jyly toqtatylǵan. Germanııadan kelgen ınvestor Aleksandr Lorenstiń kúshimen kásiporyndy qalpyna keltirý 2008 jyldyń jazynda, "Agroınterptısa" JShS qurylǵan kezde bastaldy. 2009 jyly, 20 jylǵa jýyq úzilisten keıin, óndiris qaıta iske qosyldy. 2017 jyly fabrıka jylyna 123 mln dana jumyrtqa shyǵara bastady.