Mańǵystaý oblysynda koronavırýs ınfeksııasyna shaldyqqan 160 medısına qyzmetkerine 320 mln teńge ótemaqy tólendi. Qaýipti indetten kóz jumǵan 8 medısına qyzmetkeriniń januıasyna 80 mln teńge, qosymsha 1 qyzmetkerge jergilikti bıýdjetten 10 mln teńge tólendi. Bul týraly Mańǵystaý oblystyq Qoǵamdyq kommýnıkasııa ortalyǵynda ótken brıfıngte oblystyń densaýlyq saqtaý basqarmasynyń basshysy Jamal Jamanbaeva málim etti, dep habarlaıdy Egemen.kz.
Ol óńirlik baspasóz konferensııasynda jedel jáne shuǵyl medısınalyq járdem stansııasy qyzmetkerleriniń ústemaqy tóleý máselesine toqtaldy.
"Máselen, qazan aıyna deıin ústemaqy tóleýde qyzmetkerdiń naqty jumys istegen ýaqyty kúndermen eseptelse, 15 qazannan bastap tártip ózgeredi. Endi jumys istegen ýaqyttary saǵatpen esepteletin boldy. Bul jaǵdaıda burynǵy nusqamamen sońǵy tólenetin ústemaqynyń mólsheri edáýir azaıatyny anyqtaldy. Jedel-járdem qyzmetiniń kishi býyn qyzmetkerlerine ústemaqy tóleý kózdelmegen. Dese de pandemııa kezinde jumys kóleminiń ulǵaıýyna baılanysty, kishi býyn qyzmetkerleriniń jalaqy kólemin ulǵaıtý máselesi qarastyrylady", - dedi Jamal Jamanbaeva.
О́ńirdegi I jáne II deńgeıdi ınfeksııalyq stasıonarda 57 adam em alyp jatyr. 57 naýqastyń 8-i test tapsyrǵan, synama oń nátıje kórsetti.
"Qazirgi ýaqytta jansaqtaý bóliminde 5 naýqas jatyr. 4 naýqastyń jaǵdaıy aýyr, taǵy 1 naýqas óte aýyr hálde dep baǵalanýda. Bireýi tynys alý apparatyna qosylǵan. Bul bólimge túskenderdiń nasharlaýyna jedel tynys jetispeýshiligi jáne ilespe aýrýlardyń bolýy sebep. Búginde aımaqtyń oqshaýlaý oryndaryndaǵy tósek-oryn júktemesi 27 paıyzdy quraıdy. Sondaı-aq Mańǵystaýda jedel-járdem avtokóliginiń sanyn kóbeıtý maqsatynda 62 reanımobıl alynady. Qazirgi ýaqytta 20 jedel-járdem kóligi paıdalanýǵa berildi. Jyl sońyna deıin aýyldyq eldi-mekenderge 34 medısınalyq ÝAZ avtokóligi alynatyn bolady. Kúni keshe 2 jyljymaly medısınalyq keshen alynyp, Qaraqııa jáne Túpqaraǵan aýdanyna berildi", - dedi Jamal Jamanbaeva.
Oblys kóleminde 215 ınfeksııalyq I-II satyly tósek oryn, reanımasııalyq tósek sany 43. Anyqtamasyz shetelden kelgen Qazaqstan Respýblıkasynyń azamattary men shetel azamattaryna arnalǵan karantındik stasıonarlarda barlyǵy 270 tósek oryn bar.