Qyzylorda oblysyndaǵy Qaraózek aýylynda sý qoımasy salynady. Bul týraly QR Ekologııa, geologııa jáne tabıǵı resýrstar mınıstrliginiń Facebook paraqshasynda ótken tikeleı efırdegi suhbatta «Qazsýshar» RMK Qyzylorda fılıalynyń dırektory Hamıt Bıimbetov málimdedi.
«Qaraózek aýylynda taǵy bir jańa sý qoımasy salynady. Jobalyq smetalyq qujat bıyl saraptamaǵa beriledi. Keler jyly qarjy máselesi sheshilýi tıis», - dep atap ótti Hamıt Bıimbetov. Sonymen qatar ol Qyzylorda sý torabyndaǵy jóndeý jumystary týraly da aıtty.«Qyzylorda sý torabyn jóndeýge 2020 jylǵa 481 mln teńge, 2021 jylǵa 1 mlrd 420 myń teńge, 2022 jylǵa 709 mln teńge qarastyrylǵan. Sol jaq magıstral kanalynda beton jumystary júrgizilýde. 2022 jyly barlyq jumys bitýi tıis. Atalǵan sý toraby 1956 jyly paıdalanýǵa berilse, buǵan deıin keshendi jóndeýden ótpegen edi. Budan bólek Aıtek, Jıdeli sý qoımalary jóndelýde. Olardyń jumysy 2020 jyldyń sońyna deıin aıaqtalady. Jıdeli jeltoqsannyń basynda iske qosylady»,- dedi fılıal basshysy. Suhbat barysynda vegetasııalyq kezeńniń aıaqtalýy sóz boldy.«Bıyl vegetasııalyq kezeń basynda Kóksaraı kontrregýlıatoryna 3 mlrd-tyń ornyna 2 mlrd tekshe metr sý jınalyp, 1 mlrd tekshe metr jetpeı dıhandar azdap qınaldy. Biraq ákimdik kúrish egý mekemelerimen birge 300 km ishki kanaldardy tazalady. Biz 61 km magıstraldi kanaldardy tazaladyq. 90 myń gektar kúrish egilse, sonyń bárine kezekpen bekitilgen keste boıynsha úlestire otyryp, sý jetkize aldyq», - dedi Hamıt Bıimbetov. Aıta keteıik, Qyzylorda oblysyndaǵy bıylǵy vegetasııalyq kezeńde barlyq kúrish alqaptary sýarmaly sýmen qamtyldy.