Aqtóbe oblysy boıynsha Qylmystyq-atqarý júıesi departamentine qarasty "Ulttyq ulannyń" túzeý mekemesin kúzetip, áskerı mindetterin ótegen №6655 áskerı bólimi 1-shi atqyshtar rotasynyń sarbazdary alǵys hattarmen marapattaldy, dep habarlaıdy Egemen.kz
Oblystyq QAJ departamentine qarasty KA-168/2 mekemesin kúzetýge ótken jyly Ulttyq Ulannyń №6655 áskerı bólimindegi 1-shi atqyshtar rotasynan 55 sarbaz jiberilgen.
"Túzeý mekemesindegi tynyshtyq pen tártiptiń saqtalýy – eń aldymen qaraýyl kúzetinde qaltqysyz qyzmet atqarǵan qyraǵy jaýyngerlerimizdiń arqasy. Sizder, óz ómirlerińizge tóngen qaýipti oılamaı, túzeý mekemesindegi ishki turaqtylyqty saqtaýda mindetterińizdi adal atqaryp, jınaqylyq pen áskerı tártiptiń jaqsy úlgisin kórsettińizder. Otanǵa adal bolýǵa áskerı Ant bergen kúnnen bastap, kúni-túni qyraǵylyq pen saqtyqty, erekshe jaýapkershilikti qajet etetin osy qyzmetti adal da abyroımen atqarǵan sazbazdarymyz aldaǵy ýaqytta da otansúıgishtiktiń jarqyn úlgisin kórsete beredi dep senemin", dedi Aqtóbe oblysy boıynsha QAJ departamenti bastyǵynyń orynbasary, ádilet polkovnıgi Dýlat Jumageldın.
"Túzeý mekemesin kúzetýge jiberer aldynda komandırlerimiz bizdi psıhologııalyq jáne kúsheıtilgen áskerı daıyndyqtan ótkizdi. Olar bizdi kez kelgen jaǵdaıǵa ázir bolýǵa, shapshań oılaýǵa jáne tez qımyldaýǵa, moraldyq-psıhologııalyq turǵydan myqtylyqqa úıretti. О́z basym áskerı mindetimdi túzeý mekemesinde atqaryp shyqqanyma esh ókinbeımin. О́ıtkeni bir jyldyń ishinde men jınaqylyqqa úırendim, ýaqyttyń qadirin bildim, óz isime jaýapkershilikpen qaraýǵa mashyqtandym, batyl bola tústim. Eń bastysy – Otandy súıý, elge qyzmet etýdiń erejesi de qarapaıym bolatynyna kózim jetti. Bul qoǵamda adal ómir súrý, ádiletsizdikke tózbeý, tártip buzbaý, joldastaryńdy qadirleý, jaqyndaryńdy syılaý, ómirde tańdaǵan mamandyǵyńmen kásibı deńgeıge kóterilý, otbasyn quryp, jaqsy da ónegeli urpaq ósirý", dedi 1-shi atqyshtar rotasynyń sarbazy Mustafa Ismaıl marapattaý rásiminde.
Saltanatty sharanyń sońynda KA-168/2 mekemesiniń tárbıe isi jónindegi orynbasary, ádilet maıory Qanat Maqatov te mekeme bastyǵynyń atynan 1-shi atqyshtar rotasynyń sarbazdaryna alǵys hattar tabystady.