Sarqan aýdanynda jel elektr stansasy salynady. Bul jóninde aýdan ákimi Talǵat Qaınarbekov turǵyndarmen aldyndaǵy eseptik kezdesýinde aıtty, dep habarlaıdy Egemen.kz
Sarqan aýdany ákimdiginiń málimetine qaraǵanda, Lepsi aýyldyq okrýgine qarasty aımaqta «Abaı 2» JShS qýattylyǵy 50 MVt bolatyn jel elektr stansasyn salmaq. Jobanyń ınvestısııalyq kólemi 19 mlrd 400 mln teńgeni qurap otyr, onda 50 turaqty jańa jumys ornyn ashý josparlanǵan.
Sonymen qatar «Basqan paýer» JShS qýattylyǵy 4,2 MVt jáne 4,8 MVt bolatyn sý elektr stansalary qurylysynyń jobasyn iske asyra bastady. Ony júzege asyrý úshin jeke qarajaty esebinen 11 mlrd. teńge kóleminde ınvestısııa tartylǵan.
Sarqan aýdanynyń 2021 jylǵa arnalǵan josparlary munymen shektelmeıdi. Cherkassk a/o Qarǵaly aýylynda «AZIA GOLD» JShS dárilik shóp óndirý kásipornyn ashýdy kózdep otyr. Jobalyq quny – 442 mln teńge. Kásiporyn 35 adamdy turaqty jumys ornymen qamtıdy.
Aýyl sharýashylyǵy boıynsha Amangeldi aýyldyq okrýginde «BASKAN RIV» JShS jobalyq quny 1 mlrd teńge bolatyn 10 myń analyq basqa arnalǵan qoı sharýashylyǵy keshenin salýdy josparlap otyr.
Aýdan týrızmdi damytýǵa da basymdyq bermek. Osy oraıda Balqash kóli jaǵalaýynyń ınjenerlik kommýnıkasııalar jelisine jobalyq-smetalyq qujattama jasalyp jatyr.
«Búgingi kúnge Balqash kóliniń joldarynyń jóndeý jumystaryna 200,0 mln teńge bólindi. Qurylys-montaj jumystary aıaqtalǵannan keıin 13 mlrd teńge ınvestısııa tartý jáne 7 myń adamǵa jańa maýsymdyq jumys oryndary ashylady degen josparymyz bar», dedi Sarqan aýdanynyń basshysy Talǵat Qaınarbekov.
Aıta ketsek, 2020 jyly negizgi kapıtalǵa 10 mlrd 934 mln teńge kóleminde ınvestısııa tartylǵan.