Ázerbaıjanda myńdaǵan medısına qyzmetkeri vaksına alyp, eshqaısysy da densaýlyq jaǵdaıyna shaǵymdanǵan joq. Bul týraly Velı Ahýndov atyndaǵy medısınalyq profılaktıka ǵylymı-zertteý ınstıtýtynyń dırektory Adıl Allahverdıev málim etti, dep habarlaıdy Egemen.kz
A. Allahverdıevtiń aıtýynsha, vaksınalardyń barlyǵynyń da jetilmegen jaqtary bolýy múmkin. Sondaı-aq, olar júıeli jáne naqty bir máselege baılanysty bolady.
«Júıeli túrdegi janama áserleri – dene qyzýy, álsizdik, bulshyqet aýyrýy jáne t.b. Jergilikti áser – bul vaksına egilgen jerdegi qyzarý, aýyrsyný. Qazirdiń ózinde 60 myńnan astam medısına qyzmetkeri vaksına aldy. Baqylaý jumystary kórsetkendeı, adamdarda kúrdeli asqynýlar baıqalmaǵan. Men ózim vaksına aldym. Dostarym sııaqty eshqandaı shaǵymym joq», dedi ǵylymı-zertteý ınstıtýtynyń basshysy.
Dáriger Túrkııada da, Ázerbaıjanda da vaksına alǵandar arasynda koronavırýsty qaıta juqtyrý jaǵdaılary bolmaǵanyn atap ótti. Búgingi kúnge deıin Ázerbaıjanda qoldanylatyn «Coronovac» vaksınasynyń tıimsizdigi týraly eshqandaı aqparat joq.
A.Allahverdıev budan buryn aıtqanyndaı, Ázerbaıjanǵa jetkizilgen qytaılyq «Coronavac» vaksınasy joıylǵan COVID-19 vırýsynan jasalǵan.
«Bul vaksınanyń eń úlken artyqshylyǵy – ekpeden keıingi kez-kelgen aýrý belgileriniń baıqalmaýynda. Taǵy bir artyqshylyǵy vaksınany saqtaýǵa yńǵaıly», dep sendirdi sarapshy.
Ázerbaıjan Mınıstrler Kabıneti janyndaǵy Jedel shtabtyń málimeti boıynsha, ótken táýlikte elde taǵy 191 adam koronavırýs ınfeksııasyn juqtyrǵan. 226 adam saýyǵyp ketkenimen, 3 adam qaıtys bolǵan. Búgingi kúnge deıin elde koronavırýs juqtyrǵan 231 840 adam tirkeldi. Onyń 3173-i qaıtys boldy.