Búgin «Túrkistan – Túrki áleminiń rýhanı astanasy» halyqaralyq onlaın-konferensııasynda Syrtqy ister mınıstriniń orynbasary Shahrat Nuryshev Túrkitildes memleketter yntymaqtastyǵy keńesi beıresmı sammıtiniń qorytyndylary týraly aıtty, dep habarlaıdy Egemen.kz
Keńes quramyndaǵy memleket basshylarynyń salıqaly saıasaty túrki ıntegrasııasyn jańa deńgeıge kóterip, «túrki renesansyna» muryndyq bolǵanyn atap ótti.
«Ortaq tamyry, tarıhı, mádenı jáne ulttyq qundylyqtary bar túrki memleketteriniń ósip kele jatqan bedeli men ekonomıkalyq qýaty halyqaralyq jáne óńirlik aýqymda yntymaqtastyqty barǵan saıyn tartymdy ete túsýde. Energetıkalyq resýrstardyń bolýy jáne qolaıly geografııalyq ornalasýy, bizdiń elderdi jahandyq ekonomıkanyń mańyzdy quramdas bóligi retinde aıqyndaýda», dedi Shahrat Nuryshev.