Elbasy Nursultan Nazarbaev Eskendir Hasanǵalıevtiń qaıtys bolýyna baılanysty marqumnyń otbasy men týǵan-týystaryna kóńil aıtý jedelhatyn joldady, dep habarlaıdy Egemen.kz Elbasynyń baspasóz qyzmetine silteme jasap.
Nursultan Nazarbaev halqymyzdyń birtýar ánshi-kompozıtory, Qazaq KSR-nyń Halyq ártisi, Memlekettik syılyqtyń laýreaty Eskendir Hasanǵalıevtiń ómirden ozǵany týraly sýyt habardy kúızelispen qabyldady.
Qazaqstannyń Tuńǵysh Prezıdenti orny tolmas aýyr qaıǵyǵa ortaqtasyp, kóńil aıtty.
«Eskendir Hasanǵalıev óziniń qaıtalanbas týyndylary arqyly qazaq mýzyka óneriniń órkendeýine ólsheýsiz úles qosty. Onyń «Atameken», «Ádemi-aý», «Eskirmegen mahabbat» sııaqty patrıottyq jáne lırıkalyq ánderi qalyń kópshiliktiń júreginen erekshe oryn alyp, qazaqstandyqtardyń týǵan jerge degen súıispenshiligi men otanshyldyq sezimin kúsheıte tústi.
Talantty tulǵanyń artynda qaldyrǵan mol mýzykalyq murasy men onyń jarqyn beınesi jurtshylyq jadynda árdaıym saqtalady dep kámil senemin», delingen jedelhatta.