QR Eńbek jáne halyqty áleýmettik qorǵaý mınıstrligi sarapshylarmen birlesip Áleýmettik kodeks tujyrymdamasynyń jobasyn ázirleýde, ony aǵymdaǵy jyldyń shilde aıynda Zań jobalaý qyzmeti jónindegi vedomstvoaralyq komıssııanyń qaraýyna shyǵarý josparlanyp otyr, dep habarlaıdy Egemen.kz mınıstrliktiń baspasóz qyzmetine silteme jasap.
Áleýmettik kodeksti ázirleýdiń maqsaty – azamattardyń ózderiniń áleýmettik quqyqtary men múddelerin iske asyrýy úshin ınstıtýsıonaldyq, ekonomıkalyq jáne uıymdastyrýshylyq jaǵdaılar jasaý bolyp tabylady.
«Qazirgi ýaqytta qazaqstandyqtarǵa 1 Kodekspen, 16 zańmen jáne 100-den astam zańǵa táýeldi aktimen retteletin áleýmettik qamsyzdandyrý sharalarynyń keń spektri usynylady. Jańa kodekstiń negizgi maqsaty – bul halyqtyń túsinýin jeńildetý úshin osy saladaǵy qoldanystaǵy zańnamanyń barlyq normalaryn bir qujatta shoǵyrlandyrý. Áleýmettik kodeks azamattardyń usynystaryn eskere otyryp ázirlenedi jáne adam ómiriniń árbir kezeńine qatysty bólimderdi qamtıdy. Bul qazaqstandyqtarǵa memlekettik qoldaý sharalaryn ońaı túsinýge múmkindik beredi», dep atap ótti Eńbek jáne halyqty áleýmettik qorǵaý birinshi vıse-mınıstri Aqmádı Sarbasov.
Onyń aıtýynsha, Kodeksti qabyldaý halyqtyń áleýmettik zańnamany túsinýin jeńildetip qana qoımaı, normatıvtik quqyqtyq aktiler mazmunynyń biryńǵaı stılin qamtamasyz etedi (áleýmettik qamsyzdandyrý salasyndaǵy birqatar zańdar 90-shy jyldardyń basynda qabyldanǵan, al odan beri NQA ázirleý tásilderi aıtarlyqtaı ózgergen).
Sondaı-aq Kodeks sheńberinde azamattardyń áleýmettik quqyqtaryn júıeleý júzege asyrylady – bir qujatta adamnyń ómir jolynda, tirshilik áreketiniń barlyq salalarynda týyndaıtyn barlyq bazalyq quqyqtar, onyń ishinde eń tómengi áleýmettik standarttar kórsetiletin bolady.
Tujyrymdamany ázirleý sheńberinde QR Parlamentiniń depýtattaryn, ortalyq memlekettik organdardyń, úkimettik emes uıymdardyń, qoǵamdyq keńesterdiń ókilderin, sondaı-aq bastamashyl azamattardy qosa alǵanda, áleýmettik salanyń túrli baǵyttary boıynsha 100-den astam sarapshynyń qatysýymen jumys toby quryldy.
Jumys tobynyń qyzmeti barysynda QR 30-dan astam zańnamalyq jáne 150 zańǵa táýeldi aktileri, sondaı-aq áleýmettik zańnamany retteýdiń halyqaralyq tájirıbesi zerdelendi.
Halyqpen jáne qoǵamdyq birlestiktermen ótkizilgen kezdesýlerdiń qorytyndysy boıynsha jumys toby 500-ge jýyq usynys jınap, olardy qarady.
Jumys toby Kodeksti eki bólikten turatyn – jalpy jáne erekshe bólikterden jasaýdy usynady.
Jalpy bólikte memleket pen azamat arasyndaǵy áleýmettik qatynastardy olardyń ózara mindettemelerin naqty aıqyndaı otyryp, quqyqtyq retteýdiń negizderi belgilenedi.
Erekshe bólikte áleýmettik táýekelderdiń jekelegen túrlerine arnalady, onda olarǵa den qoıý sharalary, áleýmettik kómek alýshylardyń sanattary, tólemderdiń mólsheri, olardy taǵaıyndaý sharttary men merzimderi aıqyndalatyn bolady.
«Kodeksti ázirleý jáne qabyldaý qazirgi ýaqytta qoldanylyp júrgen 16 zańnyń kúshin joıýǵa alyp keledi. Iаǵnı, mysaly, qazir múgedektigi bar adamdardy áleýmettik qorǵaý máseleleri 5 Zańmen reglamentteletin bolsa, onda bolashaqta bir ǵana Kodeks bolady. Bul rette jańa Kodeks búgingi kúni bar barlyq áleýmettik kepildikter men áleýmettik qoldaý nysandarynyń saqtalýyn, onyń ishinde azamattardy Memlekettik áleýmettik saqtandyrý qorynan zeınetaqylarmen, járdemaqylarmen jáne tólemdermen qamtamasyz etýdi, múgedektigi bar adamdardy ońaltý quraldarymen jáne qyzmetterimen qamtamasyz etýdi qamtamasyz etedi», dep atap ótti Aqmádı Sarbasov.
Tujyrymdama bekitilgennen keıin mınıstrlik Áleýmettik kodekstiń ózin ázirleýge kirisedi.
Buǵan deıin habarlanǵandaı, Memleket basshysy 2020 jylǵy 1 qyrkúıektegi Qazaqstan halqyna Joldaýynda Áleýmettik kodeksti ázirleý jáne qabyldaý arqyly áleýmettik zańnamany shoǵyrlandyrý boıynsha jumysty bastaýdy tapsyrǵan bolatyn.