Oral qalasynyń quramyndaǵy Zachagansk kentinde jańa meshittiń qazyǵy qaǵyldy. Meshit irgetasyna amanat qaǵaz qoıylyp, ol sharaǵa Qazaqstan Musylmandary Dinı basqarmasynyń tóraǵasy, bas múftı Naýryzbaı qajy Taǵanuly men Batys Qazaqstan oblysynyń ákimi Ǵalı Esqalıev qatysty, dep habarlaıdy Egemen.kz.
Oral qalasynyń quramdas bóligi – Zachagansk kentinde 70 myńnan asa halyq turady. Sońǵy jyldary kópqabatty úıler kóptep salynyp, erekshe kórkeıip kele jatqan aýdanda bir de bir meshit joq edi. О́ńir basshysy Ǵalı Esqalıev aıtqandaı, kent turǵyndarynyń kópten kútken tilegi oryndalatyn boldy. Ákim osyndaı ıgi sharaǵa múftı hazirettiń aranıy qatysqanyna rızashylyq bildirdi.
- Aq Jaıyq óńirine arnaıy saparmen kelip, birneshe ıgi sharaǵa qatysyp jatyrmyz. Allanyń jerdegi úıi bolatyn meshit – qasterli oryn, onyń qurylysyna qoldaý kórsetińizder, meshit qurylysyna kómektesken adamnyń alar saýaby óte zor. Paıǵambarymyz hadısinde aıtady: kim de kim ómirinde bir meshit soqsa, Alla Taǵala oǵan qııamette ózi soqqan meshit sııaqty jánnatynan úı salyp beredi deıdi. Alla Taǵala qasıetti Quranda: «Allaǵa sengender, aqıretke sengender Alla Taǵalanyń úılerin kórkeıtedi» deıdi. Bul óte saýapty is. Paıǵambarymyz Mekkeden Mádınaǵa hıjrat etken kezde alǵashqy jumysyn meshit salýmen bastaǵan. Elimizdiń astanasy qazirgi orynǵa aýysqan kezde Elbasymyz alǵashqy qurylystardyń biri etip meshitti bastaǵan edi, qazir Nursultan qalasynda 12 meshit bar. El Táýelsizdiginiń 30 jyldyǵy qarsańynda astanamyzda álemdegi eń sáýletti qurylystyń biri bolatyndaı, alǵashqy ondyqqa kiretindeı záýlim meshit qurylysy júrip jatyr. Halqymyz «Azandy el azbas» degen, búgin irgetasy qalanyp otyrǵan meshit ǵımaraty halyqty ımandylyqqa, ádildikke, adaldyqqa tárbıeleıtin oryn bolǵaı! – dedi múftı Naýryzbaı qajy Taǵanuly.
Jańa meshit qurylysy halyqtyń, jekelegen adamdardyń qarjysyna salynbaq. Ol úshin arnaıy qor qurylyp, búginde tıisti tirkeýden ótip jatyr. Qala ákimdigi meshit úshin 1 gektarǵa jýyq jer bólgen, munda bir mezgilde 1500 adam minájat etetin meshit kesheni, kólik turaǵy, taǵy basqa oryndar eskerilgen. Jańa meshittiń jalpy kólemi 2,5 myń sharshy metr, meshittiń qos munarasy 47 metr bolady dep jobalanǵan.
- Dinge shyn jany ashıtyn azamattar atsalysyp, meshit qoryna úles qosady dep oılaımyn. Meshit qurylysy qansha ýaqytqa sozylatyny belgisiz, óıtkeni memleket salyp jatqan nysan emes qoı. Bári qorǵa túsetin qarajatqa baılanysty. Qurylysty qolǵa alatyn merdiger de naqty anyqtalǵan joq, biraq tilek bildirýshiler bar, - deıdi Zachagansk kentiniń ákimi Aqqalı Áýbekerov.
Batys Qazaqstan