Nur Otan partııasynyń jańa ekologııalyq keńesiniń alǵashqy uıymdastyrý otyrysynda sý resýrstaryn tıimdi paıdalaný, orman qoryn ulǵaıtý, shóleıttený problemasyn sheshý jáne qorshaǵan ortany qorǵaý salasyndaǵy ózekti máseleler qaraldy.
«Partııanyń saılaýaldy ýádelerin oryndaý aıasynda 1 shildede jańa Ekologııalyq kodeks kúshine enedi. Endi qorshaǵan ortaǵa zııandy shyǵaryndylar úshin tólenetin barlyq aqshalaı túsim tek tabıǵatty qorǵaý is-sharalaryna jumsalady. Sondaı-aq Parlament «Janýarlardy qorǵaý týraly» zań jobasyn jáne polıgonnyń lastanǵan jerlerinde radıasııalyq qaýipsizdikti qamtamasyz etý úshin «Semeı ıadrolyq qaýipsizdik aımaǵy týraly» zań jobasyn qaraýdy josparlap otyr. Osy baǵytta belsendi jumys isteýimiz qajet», dedi keńes tóraǵasy, Májilis depýtaty Eldos Abaqanov.
Ekologııa, geologııa jáne tabıǵı resýrstar mınıstri Maǵzum Myrzaǵalıev Aqmola oblysyndaǵy Qopa, Býrabaı jáne Shortandy, Aqtóbe oblysyndaǵy Shalqar kólderin tazartý, sondaı-aq Aral teńiziniń soltústik bóligin jáne Jaıyq ózeniniń sýaǵaryn qalpyna keltirý josparlary týraly aıtty.
Nur Otan partııasynyń saılaýaldy baǵdarlamasynda 2025 jylǵa deıin 716 myń gektardan astam jerge 2 mlrd aǵash otyrǵyzý mindeti tur. Búgingi tańda bıylǵa josparlanǵan 130,2 mln aǵashtyń 66,5 mln-ǵa jýyǵy otyrǵyzyldy. Shóleıttený problemasyn sheshý úshin 433,9 myń gektar jerge sekseýil otyrǵyzylady», dedi mınıstr.
Otyrys barysynda keńes tóraǵasynyń orynbasary Edil Jańbyrshın óńirlerdegi naqty ekologııalyq problemalarǵa nazar aýdaryp, olardyń tizilimin qalyptastyrýdy usyndy.«Máselen, sý resýrstaryn utymdy paıdalaný máselesi bar, ony óńirler boıynsha naqtylaý qajet. Jaqynda Aqtóbe oblysynda (Muǵaljar, Temir aýdandary) ekobelsendiler Oıyl ózeniniń saǵasynda 33 zańsyz salynǵan bóget, 3 toǵan jáne 2 kópirdi anyqtady. Mundaı jaǵdaılar basqa oblystarda da bolýy múmkin», dedi ol.
Otyrys qorytyndysy boıynsha salalyq mınıstrlikke keńespen birlesip óńirlerde ekologııalyq saıasatty júzege asyrýdyń ádistemesin ázirleý jáne ony iske asyrýdyń tıimdiligine baǵalaý júrgizý usynyldy. Partııalyqtardy, prokýratýra men polısııa ókilderin mindetti túrde qatystyra otyryp, halyqtyń qorshaǵan ortaǵa qatysty shaǵymdaryna den qoıý úshin mobıldi toptar qurý múmkindigin qarastyrǵan jón.
Nur Otan-nyń baspasóz qyzmetiniń málimetinshe, partııanyń ekologııalyq saıasaty aıasynda qalalardyń aýasyn jaqsartý, sý resýrstaryn utymdy paıdalaný, qaldyqtardy qaıta óńdeý boıynsha jol kartalaryn júzege asyrý jalǵasady. Máselen, aldaǵy 5 jylda Nur-Sultan, Almaty, Shymkent, Atyraý, Taraz jáne Aqtóbe qalalarynda qoqysty qaıta óńdeý úlesin 30 paıyzǵa deıin jetkize otyryp, 6 qoqys óńdeý zaýyty iske qosylady. 2025 jylǵa deıin Almaty qalasyndaǵy JEO-2-ni gazǵa kóshirý josparlanyp otyr.
Partııanyń barlyq saılaýaldy ýádeleriniń oryndalýymen nurotan.kz saıty arqyly tolyǵyraq tanysýǵa bolady.