Reseıdiń birneshe aımaǵynda úı janýarlaryna koronavırýsqa qarsy ekpe salyna bastady, dep habarlaıdy Egemen.kz.
Vaksınalaý naýqany mal dárigerlik emhanalarda júrip jatyr. Bul týraly osy eldiń Maldárigerlik jáne fıtosanıtarlyq qadaǵalaý jónindegi federaldyq qyzmet ókilderi málimdedi.
Reseı naýryzda ıt, mysyq, túlki men qarakúzenge synaq jasap, janýarlarǵa arnalǵan álemdegi alǵashqy vaksınany tirkegen bolatyn. Jergilikti ǵalymdar jasaǵan koronavırýsqa qarsy bul preparat «Karnıvak-Kov» dep atalady. 2 dozasy shamamen 7 dollarǵa satylady. Ekpe salynǵannan keıin janýarlardyń boıyndaǵy ımmýnıtet jarty jylǵa deıin saqtalady eken. «Qazir biz bul vaksınany Eýroodaqta tirketý úshin jumys istep jatyrmyz. Bul iske Polsha, Germanııa men Vengrııa óte múddeli bolyp otyr. Sondaı-aq Taıland, Japonııa, Malaızııamen de kelissózder júrgizip jatyrmyz. Erteń bizdiń vaksınany Perýde tirkeý jáne jetkizý múmkindigin talqylamaqpyz», deıdi «Rosselhoznadzor» basshysynyń keńesshisi Iýlııa Melano.